Saryaǵashta úı salý úshin taǵy 500-ge jýyq turǵynǵa jer telimi beriledi

TÚRKІSTAN. QazAqparat - Saryaǵash aýdany, Jylǵa eldi mekeninde kezekte turǵan 11 azamatqa jer telimderi berildi. Aldaǵy ýaqytta turǵyn úı salý maqsatynda 500-ge jýyq azamat jer ýchaskesimen qamtylady, dep habarlaıdy QazAqparat tilshisi.

Jylǵa eldi mekeninde «Aýyl - el besigi» baǵdarlamasy aıasynda 42 gektar aýmaqty ınfraqurylymmen qamtamasyz etý úshin respýblıkalyq bıýdjetten qarjy bólinip, 16 shaqyrym elektr jelileri jáne 4 dana transformator ornatyldy. Sondaı-aq uzyndyǵy 6 shaqyrymnan asa kóshelerge shaǵal tóseý jumystary júrgizildi.

Jer telimin alǵan aýyl turǵyny Jarqynbek Qanaev halyqtyń kókeıkesti máseleleriniń biri sheshimin tapqanyna qýanyshty ekendigin jetkizdi. Kópten bergi armanynyń oryndalǵanyn aıtyp, aýdan basshysyna alǵysyn bildirdi. Sonymen qatar aýyl qarııalary da elge qyzmet etip júrgen azamattarǵa aq batasyn berip, jaqsy ister jalǵasyn taba bersin degen izgi tilekterin jetkizdi.

Aıta ketsek, búgingi tańda aýdanda 18000-nan astam azamat jer kezeginde tur.