Saryaǵashta tótenshe jaǵdaı kezinde jezóksheler qyzmet kórsetetin saýna anyqtaldy
SARYAǴASh. QazAqparat – Túrkistan oblysy, Saryaǵash aýdanynda tótenshe jaǵdaı kezinde jezóksheler qyzmet kórsetken saýna anyqtaldy. Onda «jeńgetaılyq» jasaǵan jas qyz ben ózbekstandyq jezóksheler ustalǵan, dep habarlaıdy QazAqparat tilshisi.
Oblystyq PD baspasóz qyzmetiniń málimetinshe, saryaǵashtyq turǵyn oblystyq krımınaldy polıtsııa basqarmasyna aryzdanǵan. Ol Saryaǵash qalasynda jeńil júristi qyzdar qyzmet kórsetetinin saýnanyń baryn aıtqan. Bul jáıttiń tolyq mán-jaıyn anyqtaý úshin polıtsııa qyzmetkerleri arnaıy jedel izdestirý is-sharalaryn uıymdastyryp, shaǵymdanýshy aıtqan saýnanyń jumysyn áshkerelegen. Onda úsh jezóksheniń qyzmet kórsetetini anyqtaldy. Saýnadan aıǵaqty zat retinde aqsha tárkilenip alynǵan.
«Saýnadaǵy Ózbekstan Respýblıkasynyń 2 azamatshasy Saryaǵash APB-ne jetkizilip, azamattardy qabyldap taratý ornyna qamaldy. Sondaı-aq saýna ákimshiligine QR ÁQBtK-niń 476-«Tótenshe jaǵdaı rejımin buzý» babymen hattama toltyryldy. Qazirgi ýaqytta atalǵan jaıt «Jezókshelikpen aınalysý úshin prıtondar uıymdastyrý nemese ustaý jáne jeńgetaılyq» QR QK-niń 309-baby boıynsha sotqa deıingi tergeý amaldary júrgizilýde. Tártip saqshylary qazirgi tańda istiń tolyq mán-jaıyn anyqtaýda», delingen habarlamada.
