Saryaǵashta tegin medıtsınalyq kómektiń tetikteri túsindirildi
SARYAǴASh. QazAqparat – Túrkistan oblysy, Saryaǵash aýdanynda áleýmettik saqtandyrý júıesindegi ózgerister túsindirildi. Jańa júıeniń arqasynda azamattar óz tańdaýy boıynsha elimizdiń aýmaǵyndaǵy kez- kelgen emhanada tegin medıtsınalyq kómek ala alatyny aıtyldy, dep habarlaıdy QazAqparat tilshisi.
Aýdan ákiminiń orynbasary Smaıl Tasqulov tóraǵalyq etken jıynǵa oblystyq Qoǵamdyq densaýlyq basqarmasynyń basshysy Muqan Egizbaev pen mindetti áleýmettik medıtsınalyq saqtandyrý qorynyń Túrkistan oblysy boıynsha fılıalynyń dırektory Ashat Beısenbaev, Túrkistan qalalyq emhanasynyń bas dárigeri Janar Ospanova men aýdan turǵyndary, ákimdik qyzmetkerleri men aýyl ákimderi, áleýmettik qyzmetkerler men muǵalimder jáne kirister basqarmasy qyzmetkerleri qatysty.
Jıynda sóz sóılegen A.Asanuly men J.Ospanova mindetti áleýmettik medıtsınalyq saqtandyrý júıesindegi ózgerister týraly baıandama jasap, jańa júıeniń paıdasy týraly keńirek túsindirip ótti. «Emhanaǵa qajetti qarjyny tolyǵymen qor óteıdi. Kez kelgen dárihanada usynylatyn dárilik zattar qol jetimdi bolady. Sondaı-aq, azamat saqtandyrý júıesi arqyly aýdarylǵan jarnalar men medıtsınalyq uıymdarda kórsetilgen qyzmetter týraly aı saıynǵy aqparatty alý múmkindigine ıe bolady. Sapasyz qyzmet kórsetilse nemese quqyqtary buzylsa, qor arqyly óz múddesin qorǵaı alady»,- dedi Ashat Beısenbaev.
Eske sala keteıik, 2020 jyldyń 1 qańtarynan bastap elimizde mindetti áleýmettik medıtsınalyq saqtandyrý júıesi engiziledi. Turǵyndar eki túrli medıtsınalyq paket boıynsha kómek alady. ıAǵnı kelesi jyly kepildendirilgen medıtsınalyq kómek jáne mindetti áleýmettik medıtsınalyq saqtandyrý júıesi júredi.
