Saryaǵashta polıtsııadan artpen júrip qashqan kólik júrgizýshisi ustaldy
TÚRKІSTAN. QazAqparat – Saryaǵashta polıtsııadan qashqan kólik vıdeoǵa túsip qaldy. Jol erejesin óreskel buzǵan júrgizýshi ákimshilik jaýapkershilikke tartyldy, dep habarlaıdy QazAqparat tilshisi.
Áleýmettik jelide polıtsııa qyzmetkerleriniń talabyna baǵynbaı, artqa qaraı júrip qashqan VAZ 2107 kóliginiń beınejazbasy tarady. Kúdikti toqtaıdy da, qaıta qashýǵa oqtalady. Sol sátte polıtseı kólik ishine aldyńǵy terezesinen sekirip enip úlgeredi. Osy kezde artqy oryndyqtaǵy eki qyz syrtqa qashqan. Degenmen, kóp uzamaı olar da qolǵa túsedi.
Oqıǵa Saryaǵash aýdanyndaǵy eldi mekenderdiń birinde bolǵan.
«Polıtsııa qyzmetkerleri jol erejesin óreskel buzǵan júrgizýshini ákimshilik jaýapkershilikke tartty. Sondaı-aq, quqyq buzýshynyń VAZ kóligi reseılik nómirli jáne tehnıkalyq baıqaýdan ótpegen bolyp shyqty. Nátıjesinde Saryaǵash aýdanynyń turǵyny, ıaǵnı júrgizýshige qatysty QR ÁQBtK-niń 590-baby 9-bóligi «Kólik quraldaryn paıdalaný qaǵıdalaryn buzý» jáne QR ÁQBtK-niń 595-baby 1-bóligi «Manevr jasaý qaǵıdalaryn buzý» boıynsha ákimshilik hattama toltyryldy. Avtokólik aıypturaqqa qoıyldy», - delingen Túrkistan oblysy polıtsııa departamentiniń baspasóz qyzmeti taratqan habarlamada.
