Saryaǵashta «Kók tóbe» bastapqy medıtsınalyq-sanıtarlyq kómek ortalyǵy ashyldy
SARYAǴASh. QazAqparat – Túrkistan oblysy, Saryaǵash aýdanynda «Kók tóbe» bastapqy medıtsınalyq-sanıtarlyq kómek ortalyǵy ashyldy. Derbisek aýyldyq okrýginen ashylǵan ortalyq naýqastarǵa zaman talabyna saı qyzmet kórsetedi, dep habarlaıdy QazAqparat tilshisi.
Nysannyń ashylý saltanatyna arnaıy kelgen oblystyq qoǵamdyq densaýlyq basqarmasynyń basshysy M.Egizbaev jańa nysannyń lentasyn qıyp, aq halatty abzal jandardyń aldaǵy jumystaryna sáttilik tiledi. Sonymen qatar aýdan ákimi M.Otarshıev, oblystyq máslıhattyń depýtaty A.Salımov, aýyl aqsaqaly B.Nurbekov ta kópshilikke óziniń júrek jardy izgi tilekterin jetkizdi.
Qurylysty júrgizgen «Arkua group» JShS basshysy B.Ábishev ortalyq meńgerýshisi B. Esenbekovaǵa ǵımarattyń kiltin tabystap, nysandy resmı túrde paıdalanýǵa berdi.
Aıta keteıik, mekeme zaman talabyna saı medıtsınalyq quraldarmen jabdyqtalǵan. Munda akýsher-gınekolog, ýschaskelik dárigerler, nevropatolog, kardıolog, lor, ınfektsıonıst, hırýrg, travmatolog, okýlıst, meıirbıke, kishi qyzmetkerler jáne ÝZI-dıagnostıka dárigeri medıtsınalyq qyzmet kórsetedi. Sonymen qatar aýdan turǵyndaryna qyzmet kórsetip otyrǵan aýdandyq ortalyq aýrýhanasynyń ǵımaratynda «jaraqat beketi» jáne «qabyldaý bólimi» zaman talabyna saı salynyp, aýrýhanaǵa kelýshilerge jyldam kómek kórsetý maqsatynda eski lıftiler jańartyldy.
