Saryaǵashta qaza bolǵan 5 jasar qyzdyń týystary beıbit mıtıng ótkizdi
Búgin Saryaǵash aýdany Jibek joly aýylynda kisi qolynan qaza tapqan 5 jasar qyzdyń «beısenbilik asy» ótti. Batadan shyqqan búldirshinniń týystary qylmyskerdiń qatań jazalanýyn talap etip, beıbit mıtıng ótkizdi. «Ádildik sot bolsyn!», «Pedafılderge ólim!» degen jazýy bar plakattardy ustap, 20-ǵa jýyq adam kóshege shyqty.
Jınalǵandarmen oblys prokýrorynyń birinshi orynbasary D. Syzdyqov, aýdan ákimi A. Abdýllaev, aýdandyq polıtsııa bóliminiń bastyǵy E. Beısebaev túsindirme jumystaryn júrgizdi.
«Polıtseıler qoǵamdyq tártip pen azamattardyń qaýipsizdigin qamtamasyz etý boıynsha sharalar qabyldady. Jınalǵandarmen túsindirý jumystary júrgizilip, bir jarym saǵattan keıin olar úılerine tarqady. Qazirgi tańda aýyldaǵy jaǵdaı birqalypty jáne qandaıda bir qoǵamdyq tártipti buzý bolǵan joq», - delingen Túrkistan oblysy polıtsııa departamentiniń baspasóz qyzmeti taratqan aqparatta.
Quzyrly organdar tarapynan jaǵdaı baqylaýǵa alynǵan. Al, Saryaǵash aýdany ákiminiń baspasóz qyzmeti aýyldaǵy saıası ahýal turaqty ekendigin habarlady.
Eske salsaq, Túrkistan oblysynyń Saryaǵash aýdanynda 5 jasar qyz bala kisi qolynan qaza boldy. Prezıdent Bas prokýratýra men Іshki ister mınıstrligine bolǵan qaıǵyly oqıǵanyń mán-jaıyn muqııat tekserýdi tapsyrdy.
Pyshaq jaraqatynan qaıtys bolǵan qyzdyń denesi sot-medıtsınalyq saraptamadan ótkennen keıin 14 shilde kúni jerlendi.
Keıinirek qyzdy zorlady degen kúdikti munyń aldynda adam óltirip, 10 jyl túrmede otyryp kelgeni málim boldy.
Osy is boıynsha salǵyrttyq tanytqan probatsııa qyzmetkerlerin tekserý bastaldy.
Túrkistan oblysynyń ákimi kisi qolynan qaza tapqan 5 jasar qyzdyń otbasynda bolyp, týystaryna kóńil aıtty.
Kúdiktini 2 aı merzimge kúzetpen ustaý túrindegi bultarpaý sharasy sanktsııalandy.
Túrkistan oblysy Saryaǵash aýdandyq sotynyń tóraǵasyn qyzmetinen bosatý týraly másele qozǵaldy.
