Saryaǵashta qarsy jolaqqa shyǵyp, júk kóligine soǵylǵan mashınadaǵy 4 adam qaza tapty
SARYAǴASh. QazAqparat - Túrkistan oblysynda júk kóliginiń qatysýymen bolǵan jol apaty boıynsha tergeý júrip jatyr, dep habarlaıdy QazAqparat.
31 mamyr kúni shamamen saǵat 12.25 kezinde Saryaǵash aýdandyq polıtsııa bólimine jedel járdem jelisinen kólik apaty jaıly habarlama túsken.
Saryaǵash polıtseıleri atalǵan jaıtty birden QR QK 345-baby 4 bóligimen tirkep, oqıǵa ornyna jedel jetti.
Polıtsııa qyzmetkerleri oqıǵa bolǵan aýmaqty muqııat qarap, tıisti tekserý jumystaryn júrgizdi.
Anyqtalǵandaı Saryaǵash aýdany Qaplanbek aýyldyq okrýgi Saryaǵash-Derbisek tasjolynyń boıynda «Opel-Vektra» markaly jeńil avtokóligi qarama-qarsy baǵytqa shyǵyp ketken.
Sóıtip óz jolynda kele jatqan «Kamaz» júk kóligimen soqtyǵysqan.
Saldarynan jeńil kólik júrgizýshisi jáne onyń ishindegi úsh jolaýshy oqıǵa ornynda kóz jumǵan.
Al «Kamaz» júk kóliginde tek júrgizýshisi ǵana bolǵan, ol din aman, eshqandaı dene jaraqatyn almaǵan.
Búgingi tańda bul jaıtqa baılanysty tıisti saraptamalar taǵaıyndaldy.
Oqıǵanyń tolyq mánjaıy anyqtalý ústinde. Sotqa deıingi tergeý amaldary júrip jatyr.
