Saryaǵashta karantınge qaramastan «Bata kókpar» uıymdastyrylǵan

SARYAǴASh. QazAqparat - Túrkistan oblysy, Saryaǵash aýdanynda jergilikti turǵyn «Bata kókpar» ótkizgeni úshin jaýapqa tartyldy. Ol karantın talaptaryna qaramastan Kókterek aýyly mańynda 70-ke tarta adamǵa ulttyq oıyn uıymdastyrǵan, dep habarlaıdy QazAqparat tilshisi.

Oblystyq Polıtsııa departamenti baspasóz qyzmetiniń málimetinshe, karantın talaptaryn saqtamaǵan tuǵyndy arnaıy qurylǵan mobıldi top músheleri anyqtaǵan. Jasóspirimderdi jınap, «Bata kókpar» jasaǵan azamatqa qatysty QR ÁQBtK-niń 425-baby («Halyqtyń sanıtarııalyq-epıdemıologııalyq salamattylyǵy salasyndaǵy zańnama talaptaryn, sondaı-aq gıgıenalyq normatıvterdi buzý») boıynsha ákimshilik hattama toltyrǵan. Jınalǵan materıaldar tıisti sheshim qabyldaý úshin Sanıtarlyq-epıdemıologııalyq baqylaý basqarmasyna joldandy. Al, kókparǵa jınalǵan turǵyndarǵa karantın talaptaryna jol bermeý týraly túsindirý jumystary júrgizilip, tarqatylǵan.

«Óz kezeginde Túrkistan oblysynyń polıtseıleri azamattardy karantın rejımin qatań saqtaýǵa, medıtsınalyq betperde kııýge jáne áleýmettik qashyqtyqty saqtaýǵa shaqyrady», - delingen habarlamada.