Saryaǵashta karantın kezinde otshashý atylyp, toı jasalǵan
SARYAǴASh. QazAqparat – Karantın talabyna baǵynbaǵan Saryaǵash aýdanynyń turǵyny kelin túsirip, toıynda otshashý atqan, dep habarlaıdy QazAqparat tilshisi.
Oblystyq polıtsııa depantamenti baspasóz qyzmetiniń málimetinshe, jas jubaılardyń toıy Instagram-ǵa taraǵan. Ony Saryaǵash aýdandyq polıtsııa bóliminiń qyzmetkerleri áleýmettik jelide baıqap qalyp, toı uıymdastyrǵan turǵyndy anyqtaǵan.
Tártip saqshylary men aýdandyq jergilikti organdarynan qurylǵan mobıldi top qyzmetkerleri oqıǵa ornyna baryp, teksergen. Nátıjesinde beınejazba Saryaǵash qalasynda túsirilgeni anyqtalyp, toı ıesine tıisti sharalar qoldanyldy.
«Taýarlar men kórsetiletin qyzmet sapasyna baqylaý basqarmasynyń qyzmetkerleri toı ótkizgen azamatqa qatysty QR ÁQBtK-niń 425-baby «Halyqtyń sanıtarııalyq-epıdemıologııalyq salamattylyǵy salasyndaǵy zańnama talaptaryn, sondaı-aq gıgıenalyq normatıvterdi buzý» boıynsha ákimshilik hattama toltyryldy. Túrkistan oblysynyń polıtseıleri oblys turǵyndaryna elimizde engizilgen karantın talaptaryn saqtap, árbir azamattyń óz ómiri men densaýlyǵyna asa jaýapkershilikpen qaraýǵa shaqyrady», delingen habarlamada.
