Saryaǵashta iz-túzsiz ketken 15 jasar qyz tórt kúnnen soń Shymkentten tabyldy
SARYAǴASh. QazAqparat - Túrkistan oblysynyń polıtseıleri iz-túzsiz joǵalǵan 15 jasar qyzdy tapty, dep habarlaıdy QazAqparat.
Túrkistan oblysy Saryaǵash aýdandyq polıtsııasyna jergilikti turǵyn áıel aryzdandy. Onyń aıtýynsha, kámelet jasyna tolmaǵan 15 jasar qyzy úıinen 4 kún buryn eshkimge aıtpastan shyǵyp ketip, qaıta oralmaǵan.
Ata-anasy qyzyn óz betinshe izdep, taba almaǵan. Saryaǵashtyq polıtseıler ata-anasynyń qyzdy izdeýge joǵaltqan 4 kúnin eskerip, izdeý jumysyna jeke quramdy jumyldyrdy.
Sonymen qatar, arnaıy jedel ýákilder toby Shymkent qalasyna attandy.
Osylaısha jan-jaqty júrgizilgen izdeý jumysy nátıje berdi. Polıtseıler joǵalǵan qyzdy Shymkent qalasynan tapty.
Belgili bolǵandaı, anasy men qyzy ózara sózge kelip qalǵan. Ashýǵa boı aldyrǵan 15 jasar qyz Shymkent qalasyndaǵy qurbysynyń úıine ketip qalyp, telefonyn sóndirip tastaǵan.
Búgingi tańda joǵalǵan qyz otbasymen qaıta qaýyshty. Tártip saqshylary qyz ben onyń otbasy múshelerine túsindirý jumysyn júrgizdi.
Qyzynyń aman tabylǵanyna rıza bolǵan anasy saqshylarǵa alǵysyn aıtty.
Túrkistan oblysynyń polıtseıleri ata-analarǵa balalaryn qaraýsyz qaldyrmaý qajettigin eskertedi.
«Balalaryńyz nemese jaqyndaryńyz joǵalǵan jaǵdaıda, tez arada 102 telefony arqyly polıtsııaǵa habarlasyńyz» deıdi polıtseıler.
