Saryaǵashta ınsýlt ortalyǵy men balabaqsha ashyldy
Aımaq basshysy saparyn «Jibek joly» keden beketiniń jumysymen tanysýdan bastady. Oblys ákimi sondaı-aq Jibek joly aýyldyq okrýginen ashylǵan «Bes juldyz» balabaqshasyna bardy. Jeke kásipkerdiń ıeligindegi balabaqshaǵa 1,1 mlrd teńge kóleminde ınvestıtsııa tartylǵan. Qazir 450 bala tárbıelenip jatqan mektepke deıingi mekemede alpys adam turaqty jumyspen qamtylǵan. Oblys ákimi balalarǵa bazarlyq usynyp, balabaqsha ujymynyń qadamyn oń baǵalady.
Odan keıin Janseıit Túımebaev Qaplanbek aýyldyq okrýginde ornalasqan «Jabaıy ata» sharýa qojalyǵynyń jylyjaı kesheninde boldy. Munda kókónis ósirýde ozyq tehnologııalar qoldanylǵan. Quny 1,8 mlrd teńge bolatyn joba boıynsha 15 gektar jerge qyzanaq pen qııar egilgen. Sharýa qojalyǵynda 75 adam jumys isteıdi. Jumysshylarmen tildesken óńir basshysy oblystaǵy jylyjaılar týraly sóz etti.
«Buryn joǵary tehnologııalar qoldanylǵan jylyjaılar shetelde ǵana bolýshy edi, qazir Saryaǵashta da bar. Oblystaǵy jylyjaılardyń 50 paıyzǵa jýyǵy osy aýdanda shoǵyrlanǵan. Bul jóninen Saryaǵash ózgelerge úlgi bola alady. Elbasymyz Túrkistan oblysynyń dıqandaryna búkil Qazaqstandy jemis-jıdek jáne kókónispen tolyq qamtý jóninde tapsyrma berdi. Búginde Memleket basshysynyń tapsyrmasymen sharýalarǵa túrli jeńildikter jasalyp jatyr. Nátıjesinde buryn shetelden tasymaldanatyn jemister men kókónister ózimizde shyǵarylýda. Sondyqtan, osy baǵyttaǵy jumysty kúsheıte beremiz. Memleket tarapynan qoldaý bolady»,- dedi Janseıit Túımebaev.
Halyq tyǵyz ornalasqan Saryaǵashta sport salasyn damytý da - mańyzdy máselelerdiń biri bolyp otyr. Osyny eskergen jergilikti bılik Qaplanbek aýyl okrýginde «Qaplanbek» sport keshenin ashqan. Munda 90 bala karate, taekvondo, aýyr atletıka jáne shaǵyn fýtbolmen shuǵyldanady. Sporttyń densaýlyq kepili ekenine toqtalǵan oblys ákimi munan soń Saryaǵash aýdandyq ortalyq aýrýhanasyna atbasyn burdy. Jańadan ornatylǵan kompıýterlik tomografııanyń jumysymen tanysyp, ınsýlt ortalyǵyn saltanatty túrde ashty. Saryaǵashtyq dárigerlerge 3 avtokóliktiń kiltin tapsyrdy. Zamanaýı qurylǵy arqyly bas mıdyń qan aınalymy aýrýlaryn, isik jáne ishki qurylystaǵy aýytqýlar men súıek jaraqattaryn anyqtaıdy. 
Jumys sapary sońynda oblys ákimi Saryaǵash aýdany, Darbaza aýyldyq okrýginde ornalasqan «Aı-Meıirim» balabaqshasynyń ashylý saltanatyna qatysty. Memleket pen jekemenshik áriptestik aıasynda salynǵan balabaqshada 75 bala tárbıelenedi. Nysandy salýǵa jáne ashýǵa 178 mln teńge ınvestıtsııa tartylǵan. Qazir bul mekemede 28 adam turaqty jumys istep júr. Balabaqshany ashyp bergen Janseıit Qanseıituly memleket tarapynan bilim salasyna aıryqsha qamqorlyq kórsetilip jatqanyna toqtalyp, turǵyndardy qýanyshty oqıǵamen quttyqtady.
Aıta keteıik, búginde Saryaǵash aýdanynda 203 balabaqsha jumys istep tur. Aldaǵy ýaqytta da mektepke deıingi bilim berý mekemeleriniń sany artady degen boljam bar. 
