Saryaǵashta HQO qyzmetkeri kópirden sekirmek bolǵan jigitti ólimnen qutqardy
SARYAǴASh. QazAqparat - «Azamattarǵa arnalǵan úkimet» memlekettik korporatsııasyna qarasty Saryaǵash aýdandyq halyqqa qyzmet kórsetý ortalyǵy bólim basshysynyń orynbasary Talǵat Kamılov poıyz ótkelindegi kópirden sekirip, sýıtsıd jasamaq bolǵan jigitti ajaldan arashalap qaldy, dep habarlaıdy QazAqparat.
Úıine bara jatqan Talǵat Baǵdatuly jolaı jınalyp qalǵan jurtty baıqap, jaqyndaǵanda kópirden sekirgeli turǵan jigitti kóredi. Ol birden kómekke umtylǵan.
«Men dosymnyń kóligimen úıge kele jatqanmyn. Bir kezde jınalǵan adamdardyń «sekirme» dep jatqanyn estidim. Kólikten túse sala sol jigitke qaraı júgirdim. Qasyna baryp, «inim, qalyń qalaı? Seniń bulaı isteýińe ne sebep boldy? Aqylǵa kel» dep qana surap úlgerdim. Oılanýǵa ýaqyt bolmady, ortamyzda bir tosqaýyl border bar, birden álgi jigitke qaraı sekirdim. Alǵashynda qolymnan taıyp ketti, sosyn qaıta ustap úlgerip, aıqaılap «ustańdar» dedim. Aman-esen alyp shyqqan soń qýanyp, óz-ózime keldim. Men muny erlik demeımin, bul - árqaısymyzdyń azamattyq boryshymyz»,- deıdi Talǵat.
Qulap bara jatqan jandy qutqarýǵa sol jerdegi azamattar men polıtsııa qyzmetkerleri de kómektesken.
Memlekettik korporatsııada 2009 jyldan beri jumys istep kele jatqan Talǵat Kamılov - halyqqa adal qyzmet etýden jalyqpaǵan bilikti qyzmetker, otbasynda úsh perzent tárbıelep otyrǵan ardaqty áke.
Qazirgi ýaqytta «Azamattarǵa arnalǵan úkimet» memlekettik korporatsııasy qyzmetkerin marapatqa usyný máselesin qarastyryp jatyr.
