Saryaǵashta gúl ósirýdi kásip etkender kóbeıdi
Bir qyzyǵy gúl ósirýshilerdiń kópshiligi Derbisek aýylynyń turǵyndary. Shaǵyn kásipke beıimdelgen olar úı irgelik jerden úlken tabys taýyp otyr.
Alfııa Áshirbaeva esimdi gúl ósirýshi kelinshek 35 sottyq jylyjaıyndaǵy jerdiń 15 sottyǵyn ádemiliktiń sımvoly sanalatyn gúlderge arnaǵan. Munda kósheni bezendirýge arnalǵan gúlderdiń 20-ǵa jýyq túri ósýde.
Aýyl sharýashylyǵyn qoldaý qorynan tómen paıyzben 6,0 mln teńge nesıe alǵan ol jyl saıyn 300 000 – 500 000 aralyǵynda gúl kóshetterin ósirip, satylymǵa shyǵarady. Negizgi tutynýshylary Nur-Sultan, Almaty qalalary men Túrkistan oblysynyń turǵyndary.
Al, Jańyl Slambekova alaqandaı jerde dala gúlderiniń 60-qa jýyq túrin ósiredi. Onyń jylyjaıynan shyqqan gúlder birneshe oblys pen aýdan ortalyqtarynda ósip tur. Kásip ıesi 10 jyl ýaqyt ishinde jınaqtaǵan tájirıbesiniń endi ǵana jemisin kórip jatqandyǵyn jetkizdi.
Aýyldaǵy Mahat Áýeshov esimdi turǵyn jıyrma jyldan beri osy kásippen aınalysyp keledi. Sharýa 20 sottyq jerindegi jylyjaı aýmaǵynan alǵan ónimderin satý arqyly otbasyn asyrap otyr. Al aýlasynda raýshannan bastap alstromerııa, hrızantema syndy sheteldik surypty gúlder ósip tur.
«Gúl kóshetterin ósirýdiń ózindik qıyndyqtary bar. Egilgen gúldi ár 10-15 kún saıyn sýaryp turý kerek. Jylyjaıdaǵy qalypty temperatýra 10-15 gradýs bolýy shart. Al naýryz aıynyń basynan bastap sabaǵynan qyrqylǵan gúlder satylymǵa shyǵa bastaıdy. Mereke saıyn kórshiler men aǵaıyn-týysqa óz aýlamyzda ósken gúlderdi syıǵa tartamyz. Bul kez kelgen jannyń kóńiline erekshe qýanysh syılaıtyny anyq», - deıdi ol.
Jalpy ótken jyly saryaǵashtyq sharýalar 600 myńǵa jýyq gúl ósirgen.
Osyǵandeıin saryaǵashtyqtar úı irgesindegi baqshaǵa gúl egip, kól-kósir paıdaǵa kenelip otyrǵanyn jazǵanbyz.
https://kaz.inform.kz/news/saryagashtyktar-uy-irgesindegi-bakshaga-gul-egip-kol-kosir-paydaga-kenelip-otyr_a3899331
