Saryaǵashta eki jigit shekaradan adam ótkizip, oǵan 20 myń teńgeden alyp otyrǵan

TÚRKІSTAN. QazAqparat - Túrkistan oblysynyń polıtseıleri zańsyz kóshi-qon uıymdastyrǵan kúdiktilerdi ustady, dep habarlaıdy QazAqparat.

Keles polıtsııasyna jergilikti turǵynnyń birinen habarlama kelip tústi.

Atalǵan habarlamada óńirimizde áldebir adamdar Ózbekstannan zańsyz kelýshilerdi shekaradan ótkizip, aqsha alyp júrgendigi týraly kórsetilgen.

Aqparat alysymen oblystyń tájirıbeli polıtseıleri, aýdandyq tártip saqshylarynan arnaıy top quryldy.

Barlyq qajetti jedel is-sharalary júrgizildi, jetkilikti aqparattar jınaqtaldy.

Sonyń nátıjesinde Keles aýdanynyń 2 turǵyny Ózbekstan azamatyn shekaradan ótkizbek bolǵan jerinen ustaldy.

Polıtseıler zańsyz áreket jasaǵan azamattardy tintý barysynda onyń qaltasynan aıǵaqty zat retinde qaǵaz aqshalar tárkilep aldy.

Odan bólek tergeý aıasynda 2 kúdikti turǵyn osy qyzmetteri úshin sheteldik azamattan 20 myń teńge aqsha alǵany anyqtaldy.

Osyǵan oraı tártip saqshylary zańdy belshesinen basyp, paıda taýyp júrgen 2 kúdiktige qatysty sotqa deıingi tergep tekserý amaldary júrgizilýde.

Onyń ekeýi de shekara aımaǵynda turatyn jergilikti turǵyndar bolyp shyqty.

Atalǵan 2 jas kúdiktige qatysty QR QK 394-baby boıynsha qylmystyq is qozǵalyp, tergeý amaldary júrgizilýde.

Al, shekaradan zańsyz ótken ÓR azamattarynyń is-áreketi QR QK 392-baby boıynsha tirkeldi.

Bul zańsyz áreketke baılanysty polıtsııa qyzmetkerleri kúdiktilerdiń uıymdasqan túrde qylmys jasaǵanyn senimmen aıta alady.

Zań buzýshylar árqaısysy tıesili ózine júktelgen mindetterdi oryndaǵan.

Bireýi shekaradan zańsyz ótkisi keletin adamdardy tapsa, kelesisi tabylǵan adamdy shekaradan jasyryn ótkizip otyrǵan.

Búgingi tańda 2 kúdikti qolhatpen bosatylǵan.