Saryaǵashta dárethanaǵa túsip ketken eki balany qutqarǵan polıtseı marapattaldy
TÚRKІSTAN. QazAqparat- Dárethanaǵa túsip ketken balardy qutqarǵan polıtsııa maıory Nurdaýlet Edilov «Erligi úshin» medalimen marapattaldy,-dep habarlaıdy QazAqparat tilshisi.
Oqıǵa jyl basynda Saryaǵash qalasynda bolǵan edi.
Aýdandyq polıtsııa bólimine habarlasqan jergilikti turǵyn, 3 jasar uly men 10 jasar qyzynyń aýladaǵy dárethana ishine abaısyzda túsip ketkenin aıtyp kómek suraǵan.
Habarlamany birinshi bolyp alǵan Saryaǵash APB ýchaskelik polıtsııa ınspektorlary, polıtsııa maıory Nurdaýlet Edilov pen polıtsııa kapıtany Asyl Erejepov, polıtsııa aǵa leıtenanty Aısultan Sapar oqıǵa ornynan tabyldy.
«5 metrlik ájethana ishindegi nájis 10 jasar qyzdyń ıyǵyna deıin jetken eken. Al, jasóspirim qyz janyndaǵy 3 jasar inisin nájiske batyp ketpesi úshin kóterip ustap turdy. Betonnan jasalǵan ájethana edenin temir quralmen soqqylap buzdyq. Balalarǵa qaýip tónbesi úshin, ózindik ádispen áreket ettik»,-deıdi Nurdaýlet Edilov.
Adam sııatyndaı oryn ashylǵan soń, polıtsııa maıory ájethana ishine túsip, balalardy aman esen alyp shyqqan bolatyn. Oqıǵaǵa kýá bolǵan kórshiler de ýchaskelik ınspektorlarǵa alǵystaryn aıtyp, rızashylyqtaryn jetkizdi.
Jańa jyl merekesiniń qarsańynda Nurdaýlet Edilov QR Prezıdenti Q.Toqaevtyń Jarlyǵymen «Erligi úshin» medalimen marapattaldy.
Búginde ýchaskelik polıtsııa ınspektory áriptesterimen birge 21 000 turǵyny bar Qaplanbek aýyldyq okrýginde qyzmet etýde.
Kúndelikti ózine bekitilgen aýmaqty aralap, qylmysty boldyrmaý men aldyn alý jumystaryn atqaryp keledi.
