Saryaǵashta bes jasar qyzdy 4 adam jabylyp zorlaǵany jaıly aqparat jalǵan - polıtsııa

TÚRKІSTAN. QazAqparat - Áleýmettik jelide Saryaǵashtaǵy 5 jasar qyzdy 4 adam zorlaǵany jaıynda jalǵan aqparat tarap jatyr. Osyǵan baılanysty Túrkistan oblysy polıtsııa departamentiniń baspasóz qyzmeti málimdeme jasady, dep habarlaıdy QazAqparat tilshisi.

«Túrkistan oblysynyń polıtsııa departamenti Saryaǵash aýdanyndaǵy 5 jasar qyzdyń ólimine qatysty áleýmettik jelide tarap jatqan jalǵan aqparatqa senbeýge jáne tek resmı derekkózge ǵana súıenýge keńes beredi. Búgingi tańda júrgizilip jatqan tergeý nátıjesimen atalǵan qylmystyq áreketti tek bir kúdiktiniń jasaǵany dáleldenip, ol qamaýǵa alynǵan. Ózge adamdardyń qatysy bolýy múmkin degen derekter men dálelder joq» delingen Túrkistan oblysy polıtsııa departamentiniń baspasóz qyzmeti taratqan aqparatta.

Sonymen qatar, tártip saqshylary jalǵan aqparat taratýshylarǵa QR QK 274-babymen qylmystyq jaýapkershilik kózdelgenin eskertedi.

Eske salsaq, Túrkistan oblysynyń Saryaǵash aýdanynda 5 jasar qyz bala kisi qolynan qaza boldy.

Prezıdent Bas prokýratýra men Іshki ister mınıstrligine bolǵan qaıǵyly oqıǵanyń mán-jaıyn muqııat tekserýdi tapsyrdy.

Pyshaq jaraqatynan qaıtys bolǵan qyzdyń denesi sot-medıtsınalyq saraptamadan ótkennen keıin 14 shilde kúni jerlendi.

Keıinirek qyz zorlady degen kúdikti munyń aldynda adam óltirip, 10 jyl túrmede otyryp kelgeni málim boldy.

Osy is boıynsha salǵyrttyq tanytqan probatsııa qyzmetkerlerin tekserý bastaldy.

Túrkistan oblysynyń ákimi kisi qolynan qaza tapqan 5 jasar qyzdyń otbasynda bolyp, týystaryna kóńil aıtty.

Kúdikti 2 aı merzimge qamaldy.

Túrkistan oblysy Saryaǵash aýdandyq sotynyń tóraǵasyn qyzmetinen bosatý týraly másele qozǵalyp jatyr.