Saryaǵashta baǵany kóterip jibergen dárihanalar anyqtaldy
SARYAǴASh. QazAqparat – Elimizde dári-dármek baǵasynyń kúrt ósý derekterine baılanysty Saryaǵash aýdanynda da dárihanalarǵa monıtorıng sharalary júrgizildi. Aýdan ákimi Mýhıt Otarshıev bastaǵan arnaıy monıtorıngtik jumys toby birqatar dárihanalarǵa baryp, dárilerdiń baǵasyn baqylap qaıtty, dep habarlaıdy QazAqparat tilshisi.
Arnaıy top aýdandaǵy ortalyq bazar mańynda ornalasqan 3 birdeı dárihanany aralap, birqatar kemshilikterdi anyqtady. Tekserý kezinde dárihanalardyń birinde kassalyq apparat bolmaǵan, keıbiriniń baǵalardy tym qymbattatyp jibergeni anyqtaldy. Taǵy birinde qazirgi tańdaǵy suranysqa ıe dári-dármekter bolmaǵan. Oǵan dárihana ıeleri dári-dármekterdiń ýaqtyly jetkizilmeýin sebep bolyp otyrǵanyn aıtty. Bul rette aýdan basshysy kásipkerlerge baǵany shekten tys kóterý nemese karantındik talaptar saqtalmaǵan jaǵdaıda zańǵa sáıkes jaýapkershilikke tartylatyndyǵyn eskertti. Muzhıt Otarshıev sondaı-aq, monıtorıngtik sharalar barysynda jergilikti halyqpen de sóılesti. Qandaı dáriler tapshylyq týǵyzyp otyrǵanyn surap, bul máseleni sheshý joldaryn qarastyratynyn jetkizdi.
