Saryaǵashta aǵaıyndy urylar 11 myń dollar salynǵan seıfti urlap ketken
SARYAǴASh. QazAqparat - Túrkistan oblysyna qarasty Saryaǵash aýdanynda aǵaıyndy eki jigit turǵyn úılerdiń birine urlyqqa túsip, 11myń AQSh dollary salynǵan seıfti urlap, oǵan qosa jábirlenýshiniń úıindegi jatyn bólmesinen túrli altyn buıymdaryn da qoldy etken, dep habarlaıdy QazAqparat tilshisi.
Oblystyq PD baspasóz qyzmetiniń málimetinshe, polıtsııaǵa aryzdanǵan jábirlenýshige jalpy somasy 10 mln teńgeden astam shyǵyn kelgen. Atalǵan qylmysty ashpaq bolǵan jedel ýákilder jaqyn mańdaǵy aýmaqtardy aralap, kýágerlerden surastyrǵan. Sonymen qatar, beınebaqylaý kameralaryn tekserip shyqqan. Jedel-izdestirý sharalarynyń nátıjesinde kúdikti retinde aǵaıyndy eki jigit ustalǵan. Onyń bireýi buryn sotty bolǵany anyqtaldy. Tergeý barysynda belgili bolǵandaı, aǵaıyndy ekeý qylmysty ózara aqyldasyp jasaǵan. Olar aldyn ala jábirlenýshiniń úıin baqylap, adamdardyń joqtyǵyna kóz jetkizgen soń terezeni buzyp, ishine kiredi. Jatyn bólmedegi seıfti urlap, oqıǵa ornynan boı tasalaǵan. Qoldy etken zattardy aýyl syrtyna baryp ashyp, ishindegi túrli altyn buıymdar men aqshany qaltalaryna basqan. Al, seıfti sol jerge laqtyryp ketken. Osylaısha altyndardy úılerine jasyryp, aqshany jaratyp jibergen.
Qos kúdikti qamaýǵa alynyp, tergeý amaldary júrgizilýde.
