Saryaǵashta adam qaǵyp óltirip, oqıǵa ornynan qashyp ketken kúdikti ustaldy
SARYAǴASh. QazAqparat - Túrkistan oblysynyń polıtseıleri jol-kólik oqıǵasyn jasap, tez arada izin sýytqan qylmyskerdi quryqtady, dep habarlaıdy QazAqparat oblystyq PD baspasóz qyzmetine silteme jasap.
Aǵymdaǵy jyldyń 11 sáýir kúni saǵat 09:20 shamasynda Saryaǵash APB-niń 102 qyzmetine Saryaǵash ortalyq aýrýhanasynan habar kelip tústi. Onda jol-kólik oqıǵasy saldarynan jergilikti turǵyn qaıtys bolǵany jóninde aıtylǵan.
«Atalǵan habarlama boıynsha aýdandyq polıtsııa bóliminiń jedel tergeý toby oqıǵa ornyna bardy. Tekserý barysynda 11 sáýir kúni saǵat 08:25 shamasynda Saryaǵash aýdany, Jibek joly aýylynyń shyǵys betkeıi arqyly ótetin «Jibek joly-Derbisek» tas jolynyń boıynda belgisiz júrgizýshi avtokólikpen jaıaý júrginshini qaǵyp ketkeni belgili boldy. Kúdikti jol apatynan keıin oqıǵa ornynan ketip qalǵan. Oryn alǵan jol-kólik oqıǵasynyń saldarynan jaıaý júrginshi aýrýhanaǵa jetkiziledi, biraq aýyr jaraqatynan sol jerde kóz jumady» delingen habarlamada.
Adam ólimine ákelip soqqan oqıǵa QR QK-niń 345 «Kólik quraldaryn basqaratyn adamdardyń jol júrisi nemese kólik quraldaryn paıdalaný qaǵıdalaryn buzýy» jáne 347 «Jol-kólik oqıǵasy bolǵan jerden ketip qalý» baptary boıynsha sotqa deıingi tergep-tekserýdiń biryńǵaı tizilimine tirkelgen. Qaza tapqan jaıaý júrginshi máıitine qatysty sot-medıtsınalyq saraptama taǵaıyndaldy.
Shuǵyl izdestirý nátıjesinde Saryaǵash APB qyzmetkerleri kúdikti jergilikti turǵyndy ustap, ol qamaýǵa alyndy. Qazirgi tańda tergep-tekserý sharalary júrgizilýde.
