Saryaǵashta 13 qabatty turǵyn úı qurylysy bastaldy
ShYMKENT. QazAqparat - Ońtústik Qazaqstan oblysynda bıyl 780,2 myń sharshy metr turǵyn úı el ıgiline beriledi, dep habarlaıdy QazAqparat tilshisi.
Aǵymdaǵy jyldyń 4 aıdyń qorytyndysy boıynsha 296,3 myń sharshy metr turǵyn úı, ıaǵnı 2844 páter paıdalanýǵa tapsyryldy. Bul ótken jyldyń osy merzimimen salystyrǵanda 143,5 paıyzǵa ulǵaıǵandyǵyn kórsetedi.
Oblys ákimi Janseıit Túımebaevtyń Saryaǵash aýdanyna jasaǵan sapary kezinde aýdan ortalyqtaryndaǵy turǵyn úı qurylystary jaıly aıtyldy. Máselen, Saryaǵash aýdanynda ótken jyly 19,9 myń sharshy metr turǵyn úı tapsyrylǵan bolsa, aǵymdaǵy jyldyń basynan beri 7,780 sharshy metr turǵyn úı el ıgiligine berildi.
Aımaq basshysy atalǵan aýdandaǵy sapary kezinde Qaplanbek oqý-tájirıbe sharýashylyǵy aýmaǵyndaǵy 5 qabatty 585 páterli «Nurly jer» baǵdarlamasymen salynyp jatqan 13 turǵyn úıdiń qurylysymen tanysty. Jobalyq quny 407 mln teńge bolatyn 13 turǵyn úıdiń qurylysy 2019 jyly tolyq paıdalanýǵa beriletin bolady dep kútilýde. Óńir basshysy Janseıit Qanseıituly turǵyn úılerdiń sapasyna kóbirek kóńil bólip, qurylys jumystaryn ýaqytyly aıaqtaý qajettigin tapsyrdy.
«Qazirgi tańda jańa Saryaǵash boı kóterip keledi. Qurylysy bastalǵan 45 páterli 13 turǵyn úı aıaqtalsa, 585 otbasy baspanaly bolady. Mundaı jaǵdaı sońǵy 45 jylda bolmaǵan. Bul degenimiz - Elbasymyzdyń halqyna degen qamqorlyǵy, eldiń mereıi. Sondaı-aq, turǵyn úılerdi salý barysynda aýyz sý, gaz, elektr, jylý, jol jáne abattandyrý jumystary syndy barlyq ınfraqurylym máselelerine sheshimin tabatyn bolady. Ásirese, aýdan basshylyǵyna káriz júıesiniń sheshimin tabýdy tapsyramyn», - dedi Janseıit Túımebaev.
Budan bólek, oblys ákimi jospardan tys Saryaǵash qalalyq Halyqqa qyzmet kórsetý ortalyǵyna bardy. Ondaǵy kórsetilip jatqan qyzmettermen tanysty. Sondaı-aq, sol mańdaǵy zańsyz qurylystardy synǵa aldy. Sapasy syn kótermeıtin nysandardyń qala kórkine keri áserin tıgizip jatqandyǵyn aıtty. Budan ózge oblys ákimi Qaplanbek keden beketi aımaǵyna toqtady. Ondaǵy tozyǵy jetken nysandar men zańsyz saýda núktelerin retke keltirip, keden mańyn abattandyrýdyń qajettigin aıtty.
«Saryaǵash ózge elmen shekaralas jatqan jer. Teatr - kıim ilgishten bastalady degendeı, Ózbekstan elinen kelgen qonaqtar aýdanǵa qarap eldi tanıdy. Sondyqtan ekonomıkany, týrızmdi damytamyz desek, eń áýeli bet-perdemiz bolyp tabylatyn óńirlerimizdi kórkeıtýimiz kerek», - dedi Janseıit Qanseıituly.
Aıta keteıik, aýdan basshysy Qaırat Ábdýálıevke joǵaryda atalǵan kemshilikterdi joıyp, qorytyndysyn baıandaýdy tapsyrdy.
