Saryaǵash turǵyny jerlesin pyshaqtap, 4 mln teńgesin alyp ketken

TÚRKІSTAN. QazAqparat – Saryaǵash aýdanynyń turǵyny jerlesine pyshaq jaraqatyn salyp, 4 mıllıon teńgesin alyp ketken, dep habarlaıdy QazAqparat tilshisi.

Túrkistan oblystyq polıtsııa departamenti krımınaldyq polıtsııa basqarmasynyń qyzmetkerleri kúdiktini Nur-Sultan qalasynan ustady. Tintý kezinde jas jigitten urlanǵan aqshanyń bir bóligi men basqa da aıǵaqty zattar tárkilendi.

«Qazirgi ýaqytta atalǵan jaıtqa qatysty QR QK 192-babynyń 3-bóligi «Qaraqshylyq» jáne QR QK 24-babynyń 3-bóligi, 99-babynyń 2-bóligi «Adam óltirýge oqtalý» boıynsha sotqa deıingi tergeý amaldary júrgizilip jatyr. Kúdikti qamaýǵa alyndy. Oqıǵanyń barlyq mán-jaıy anyqtalady», - deıdi Túrkistan oblysy polıtsııa departamentiniń baspasóz hatshysy Gúlnar Ábdijapparova.