Saryaǵash turǵyndary qıyn sátte maqtaaraldyqtarǵa kómek jiberdi

Olar kórshiles aýdan turǵyndaryna jalpy quny 1 mln 735 myń teńgeniń gýmanıtarlyq kómegin jóneltti, dep habarlaıdy QazAqparat tilshisi.

Gýmanıtarlyq kómek ishinde azyq-túlik, et, sý, kúrish, un, kartop, pııaz, maı, qanttan bólek, kórpe-tósek, gıgıenalyq zattar, balalarǵa qajetti keńse taýarlary da bar. Atalǵan zattar Saryaǵash aýdanyna bekitilip berilgen 5 mektepte ornalasqan 700-ge jýyq turǵyndarǵa kúndelikti taratylyp berilýde.

Aýdan ákimi Muhıt Otrashıev bastaǵan top birinshi kúnnen bastap-aq adamdar evakýatsııalanǵan jerlerge kelip, 5 mektepti óz qamqorlyǵyna alǵan bolatyn. Búginde atalǵan oryndarda Saryaǵash aýdany ákimdiginiń 30-dan astam memlekettik qyzmetkeri kúndiz-túni tynbaı halyqqa qaltqysyz eńbek etýde.

«Maqtaaral aýdanyndaǵy tótenshe jaǵdaıdy estı salysymyzben alǵashqylardyń biri retinde kómek berýdi jón kórdik. Ásirese úılerin sý shaıǵan azamattardy qamqorlyǵymyzǵa alýdy oıladyq. Bul ıgi bastamamyzdy saryaǵashtyq jomart azamattar da birden qoldaı ketti. Eń bastysy - adam shyǵyny joq. Jan aman bolsa, basqasynyń bári ornyna keleri sózsiz. Sondyqtan Myrzashól halqyna sabyrlyq pen aýyzbirlik tileımin!»,-deıdi Saryaǵash aýdanynyń ákimi Muhıt Otarshıev.

Saryaǵashtyqtardyń qamqorlyǵy men qaıyrymdy isterine maqtaaraldyqtar da rızashylyqtaryn bildirýde. Qıyn-qystaý kezeńde kómek qolyn sozǵan azamattarǵa alǵystaryn jetkizdi.