Saryaǵash pen Keles aýdandarynyń ónimderi shet elderge eksporttalýda
TÚRKІSTAN. QazAqparat – Túrkistan oblysynyń sharýalary qysqy shildede ekken kókónistiń ónimin jınaı bastady. Saryaǵash pen Keles aýdandarynyń dıqandary elimizdiń ishki jáne syrtqy naryǵyn kókónister jáne jemis-jıdektermen qamtamasyz etpek, dep habarlaıdy QazAqparat tilshisi.
Saryaǵash aýdanynyń Jartytóbe aýyldyq okrýginiń dıqandary búginde 22 tonna oramjapyraq, 18 tonna kókónis pen 20 tonna qııar, qyzanaq ónimderi tıelgen kerýendi Reseı Federatsııasyna jóneltti. Buǵan deıin atalǵan aýyldan 500 tonnaǵa jýyq kókónis ónimderi eksporttalǵan bolatyn. Aýdan halqynyń qajettiliginen artyq ónimder elimizdiń soltústik óńirleri men TMD elderine, sonymen qatar alys ta jaqyn shet elderge eksportqa shyǵarylýda. Aldaǵy ýaqytta saryaǵashtyq sharýalar eksporttaý kólemin ulǵaıtý josparlanyp otyr.
Al, kórshiles Keles aýdanynda «Baý Agro» qurylymynyń sharýalary 4 ga jylyjaıǵa qııar egip, elimizdiń megapolısterine jóneltýde. Kúnine 3 tonnaǵa deıin ónim alatyn agroqurylym jergilikti 15 turǵyndy jumyspen qamtyp otyr. Jalpy, osydan 4 jyl buryn qurylǵan jylyjaıda jyl on eki aı boıy qyzanaq, qııar ósirilip, ishki naryqqa saýdalanyp keledi. Sonymen qatar Alpamys batyr aýyldyq okrýginiń dıqandary bul kúnde jergilikti klımattyń yńǵaıyna qaraı qyryqqabat egýdi meńgerip alǵan. Búginde olar «Biz birgemiz» aktsııasy aıasynda Nur-Sultan qalasyna ónimniń alǵashqy legin jiberdi.
