Saryaǵash mektepterinde parasat týraly tárbıe saǵaty ótti

SARYAǴASh. QazAqparat – Túrkistan oblysy Saryaǵash aýdanyndaǵy mektepterde «Parasat» taqyrybyndaǵy tárbıe saǵaty ótti. Biryńǵaı sabaq Sybaılas jemqorlyqqa qarsy is-qımyl agenttigi Túrkistan oblysy boıynsha departamentiniń bastamasymen, respýblıkalyq «Adaldyq saǵaty» aıasynda uıymdastyryldy, dep habarlaıdy QazAqparat tilshisi.

«Parasat» taqyrybyndaǵy dáriste oqýshylarǵa adaldyq, ádildik, ádeptilik, jaýapkershilik, ar-namys sııaqty kóptegen adamı qasıetter túsindirildi. Osy qundylyqtar qoǵamda sybaılas jemqorlyqqa qarsy mádenıetti qalyptastyrýdyń negizi ekeni aıtyldy. Bul ıgi bastamada «Nur Otan» partııasy, «Atameken» UKP, ardagerler alqasy, jastar uıymdarynyń aýdandaǵy ókilderi, sondaı-aq, bilim berý salasynyń úzdikteri, Parasat elshileri, arnaıy monıtorıngtik top ókilderi, qoǵam belsendileri shákirtterge dáris oqydy.

Adaldyq saǵatynda lektorlar adam boıynda qalyptasqan adaldyq pen ádildik qundylyqtarynyń qasıetin, taǵylymǵa toly tarıh betterindegi ádildikti tý etken kemeńgerlerdiń týralyǵyn jan-jaqty aıtyp ótti.

Shara barysynda oqýshylar adaldyqty, parasattylyqty qalaı túsinetinin, ony qalyptastyrý jónindegi oılaryn aıtty. Sonymen qatar, oqýshylar oıynda júrgen suraqtaryn qoıyp pikir almasty.

Aıta keteıik, qoǵamda sybaılas jemqorlyqqa qarsy mádenıetti qalyptastyrýda óskeleń urpaqpen jumys qaǵıdatty mańyzdy ról atqarady.