Saryaǵash demalys aımaǵy taǵy bir shıpajaımen tolyqty
ShYMKENT. QazAqparat - Ońtústik Qazaqstan oblysyndaǵy Saryaǵash demalys aımaǵynda taǵy bir shıpajaı ashyldy. «Aq tilek» saýyqtyrý ornynyń qurylysyna 505 mln. teńge jumsalǵan.
Zamanaýı úlgide salynǵan nysandy jergilikti bılik BAQ ókilderine tanystyrdy, dep habarlaıdy QazAqparat HAA tilshisi.
Jańadan salynǵan shıpajaı 150 adamǵa qyzmet kórsetýge qaýqarly. Zamanaýı quraldarmen jabdyqtalǵan demalys orny barlyq talaptarǵa saı jasalǵan. Sondaı-aq jergilikti 100-ge tarta turǵyn jumyspen qamtyldy.
Aıta keteıik, Saryaǵash demalys aımaǵynda búginde 22 emdik saýyqtyrý ortalyǵy qyzmet etedi. Aýdanda mıneraldyq jáne termaldyq sýlardy paıdalaný arqyly saýyqtyrý týrızmi jolǵa qoıylǵan. Saıaly mekenniń týrıstik áleýetin odan ármen kóterý úshin qosymsha baǵdarlama jasalyp, qolǵa alynýda. Oǵan sáıkes kýrort aýmaǵyn 530 gektarǵa ulǵaıtý josparlanǵan. Aýdandyq kásipkerlik bólimi qyzmetkerleri kýrorttyq týrızm baǵyty boıynsha taǵy 10 jobanyń usynylyp, jobalyq smetalyq qujattary ázirlenip jatqanyn aıtady.
