Saryaǵash aýdanynyń dıhandary 60 mlrd teńgeniń ónimin jınady
TÚRKІSTAN. QazAqparat - Túrkistan oblysynyń ákimi Janseıit Túımebaev Saryaǵash aýdanyndaǵy sapary barysynda aýyl sharýashylyǵy eńbekkerlerine arnalǵan «Altyn kúz-2018» merekelik sharasyna qatysty, dep habarlaıdy QazAqparat.
Bıyl saryaǵashtyq dıqandar mol ónim jınady. Mejelengen jospar artyǵymen oryndalyp, 60 mıllıard teńgeniń ónimi alynǵan. Óz kezeginde oblys basshysy jergilikti sharýalardy aıtýly merekemen quttyqtady.
«Eli tatý, jeri berekeli Saryaǵashta kóptegen jumystar jasalýda. Respýblıkadaǵy jylyjaılardyń 50 paıyzdan astamy osy óńirge tıesili. Bıylǵy jyldyń ózinde 61 842 gektar jerge egis egilip otyr. Deıturǵanmen, jyl saıyn egis kólemin, ónim kórsetkishin arttyra túsýimiz kerek. Jalpy, bul rette, Saryaǵash aýdany kósh bastap tur. Sondyqtan búkil Saryaǵash halqyna, óńirdiń sharýalaryna úlken alǵysymdy bildiremin», - dedi Janseıit Túımebaev.
Sondaı-aq, merekede aýyl sharýashylyǵy ónimderinen jármeńke uıymdastyryldy. Onda qoı eti men sút ónimderi, kókónister arzandatylǵan baǵada satyldy. Sonymen qatar, jyl qorytyndysy boıynsha úzdik kórsetkishterge qol jetkizgen qurylymdar men eńbek ozattary marapattaldy. 
