Saryaǵash aýdanynyń ákimi aýyldardy tabıǵı gazǵa qosý jumystarymen tanysty
Aýdan basshysy turǵyndardyń turmystyq jaǵdaıyn jaqsartýǵa baǵyttalǵan jumystar boıynsha tıisti laýazymdy tulǵalarǵa naqty tapsyrmalar júktep, nátıjesin kúndelikti baıandap otyrýdy tapsyrdy, dep habarlaıdy QazAqparat tilshisi.
Tegisshil aýyldyq okrýginde ornalasqan AGRS-ke Tegisshil, Qurkeles, Jylǵa, Darbaza aýyldyq okrýgteriniń 22 eldi mekenin qosý josparlanǵan. Qazirgi tańda jalpy 11 eldi mekenge ishki júıeleriniń qurylysy júrgizilip, qosylýǵa daıyn. Taǵy 11 eldi mekenge qosý úshin jobalyq-smetalyq qujattama ázirlenip, saraptama qorytyndysy alynǵan.
Jalpy, tabıǵı gaz salasy boıynsha búgingi tańda Saryaǵash aýdanynyń 71 eldi mekeniniń 36-sy tabıǵı gazben qamtamasyz etilgen. Bul kórsetkish 50,7 paıyzdy qurap otyr. Aýdan ákimi Jylǵa aýyldyq okrýgine de baryp, jańadan salynyp jatqan mekteptiń qurylysymen tanysty. Atalǵan nysan aǵymdaǵy jyly paıdalanýǵa berilmek. Muhıt Otarshıev aýyldy aralaý barysynda biraz kúttirmeıtin jaıttardy kórip, jaýaptylarǵa naqty tapsyrmalar júktedi. Osylaısha, aýyldyq okrýgtegi ózekti bolyp otyrǵan aýyz sý, tabıǵı gaz máselesin sheshý joldary qarastyrylatyn boldy.
