Saryaǵash aýdanynda jylyjaı kólemi 664 gektarǵa jetti

TÚRKІSTAN. QazAqparat – Túrkistan oblysy, Saryaǵash aýdanynda jylyjaı kólemi 664 gektarǵa jetti. Aýdanda aýyl sharýashylyǵy salasy boıynsha ónim kólemi 66 mlrd 705 mln teńgege josparlansa, bul kórsetkish ótken jyldyń qortyndysymen 77 mlrd 111 mln teńgege jetti, dep habarlaıdy QazAqparat tilshisi.

Aýdan ákimdiginiń málimetinshe, osy atalǵan 664 gektar jylyjaılardan ótken jyly 132 myń tonna ónim alynǵan. Onyń basym bóligi qyzanaq pen qııar ónimderi bolyp otyr. Kásipkerlik salasynda saryaǵashtyq ónerkásip kásiporyndarynan 27,0 mlrd teńgeniń ónim óndirilgen. Negizgi kapıtalǵa tartylǵan ınvestıtsııa kólemi 38,6 mlrd teńgeni quraǵan. Al, «Bıznestiń jol kartasy 2020» baǵdarlamasy aıasynda jalpy quny 330,0 mln teńgeni quraıtyn 84 joba qoldaý tapty. Jalpy quny 10,0 mln teńgeni quraıtyn 4 joba grant negizinde qarjylandyrylǵan.

Sonymen qatar, 2 mlrd 220 mln teńgeniń aýyl sharýashylyǵynyń negizgi kapıtalyna jáne 107,3 mln teńge tamaq ónimderi óndirisine ınvestıtsııalar tartylǵan. «Saryaǵash aýdany sý sharýashylyǵy» memlekettik kommýnaldyq kásiporny tarapynan aýyl sharýashylyǵy taýaryn óndirýshi tulǵalarǵa qajetti aǵyn sý jetkizilip berilgen.

Al sýarmaly jerlerdi qaıta aınalymǵa qosý jáne melıoratıvtik jaǵdaıyn jaqsartý maqsatynda bıýdjetten 1,2 mlrd teńge bólingen. Bul qarjy esebinen 3 kanalǵa kúrdeli jóndeý, 8 kanal men 2 qashyrtqyǵa aǵymdaǵy jóndeý jumystary qarastyryldy. Bul rette 12 shaqyrym kanal betondalyp, 80 shaqyrym sý júıelerine aǵymdaǵy jóndeý jumystary júrgizilgen.