Saryaǵash aýdanynda jańadan 9 shıpajaı salynady
ShYMKENT. QazAqparat - Ońtústik Qazaqstan oblysynyń ákimi Janseıit Túımebaev is-saparmen Saryaǵash aýdanynda bolyp, Kókterek kentindegi shıpajaılardyń jumysymen tanysty, dep habarlaıdy QazAqparat tilshisi.
Aımaq basshysy shıpajaılardyń sanyn kóbeıtýde áýeli demalýshylarǵa qajetti jaǵdaı jasaý kerektigin atap ótti.
«Saryaǵash óńirinde týrızmdi damytý úshin aýdannyń áleýeti jetedi. Munda tórtkúl dúnıege belgili shıpaly sýy bar, ınfraqurylym máselesi sheshilgen. Árıne, shıpajaılar sanynyń artqandyǵy kelýshilerdiń kóbeıgendigin kórsetedi. Máselen, búgingi tańda oblys boıynsha 190 qonaq úı, 44 shıpajaı, 61 demalys aımaǵy, 19 balalardy saýyqtyrý lageri jáne 104 týrıstik uıym bar. Bastysy, atalǵan oryndarda kelýshilerge joǵary qyzmet kórsetý sapasyn nazarda ustaý qajet», - dedi Janseıit Túımebaev.
Aýdannyń óndiristik qýaty men týrıstik áleýetin tanystyrǵan aımaq basshysy Qaırat Ábdýálıev búginde Qazaqstannan bólek, kórshi memleketterden Saryaǵash óńiriniń shıpaly sýyn izdep keletin týrıster sany artyp kele jatqandyǵyn aıtty.
«Aǵymdaǵy jyldyń І toqsanynda Saryaǵash aýdanyna kelýshiler sany 34 myńnan astam adamdy qurap, ótken jyldyń tıisti kezeńimen salystyrǵanda 21,1 paıyzǵa artyp otyr. Qazirgi tańda Saryaǵash aýdanynda 20 qonaq úı, 12 mádenı-tarıhı nysan, 1 balalar shıpajaıy men lageri jáne 26 emdik-saýyqtyrý ortalyǵy qyzmet kórsetedi. Osy jyly jańadan 2 shıpajaı ashylsa, aldaǵy 5 jyl aralyǵynda taǵy 9 shıpajaı salý josparlanyp otyr», - dedi aýdan ákimi.
Aıta keteıik, aǵymdaǵy jyly óńirde týrızm salasynda «Tsıfrlyq Qazaqstan» memlekettik baǵdarlamasyn júzege asyrý maqsatynda jol kartasy bekitilgen bolatyn. Osy rette oblystyń 35 tanymal týrıstik nysanynda halyqaralyq standartqa sáıkes tsıfrlyq QR tólqujattar ornatylǵan. Osy tólqujattar arqyly kelýshi týrıster nysan boıynsha 6 tilde jyldam ári yńǵaıly aqparat alýǵa múmkindigi bar.
