Saryaǵash aýdanynda turmysy tómen otbasylar qajetti azyq-túlikpen qamtylýda

TÚRKІSTAN.QazAqparat – Túrkistan oblysynyń Saryaǵash aýdanynda «Qamqorlyq» jobasy aıasynda turmysy tómen otbasylar qajetti azyq-túlikpen qamtylýda, dep habarlaıdy QazAqparat tilshisi.

Oblys ákimi tarapynan júktelgen tıisti tapsyrmaǵa sáıkes, aýdannyń barlyq aýyldaryndaǵy kómekke muqtaj jandardy anyqtap, olarǵa naqty kómek kórsetilip jatyr.

Aýdan ákimi, Nur Otan partııasy aýdandyq fılıalynyń tóraǵasy Muhıt Otarshıev atalǵan joba aıasynda Qyzyljar jáne Qurkeles aýyldyq okrýgterindegi az qamtylǵan turǵyndardyń úıine baryp, jaǵdaılarymen tanysty.

Aýdan basshysy aýyldaǵy kásipkerlerdi tartý arqyly muqtaj januıalardyń talap-tilegin tyńdady. Árbir otbasyna azyq-túlik sebetin tabystady. Jumysqa qabiletti azamattaryn qaıta oqý kýrstaryna joldama berý arqyly jumysqa turýyna yqpal etetin boldy. Sondaı-aq, áleýmettik kómek kórsetý syndy máseleler boıynsha turaqty kómek kórsetilip turatynyn jetkizdi.

Aýdan basshysynyń aıtýynsha, atalǵan baǵdarlama memleket tarapynan beriletin járdemaqy men kómekten bólek júzege asady. Turmys taýqymetin tartqan jandarǵa jan-jaqty qamqorlyq kórsetý arqyly, kedeılik sheńberinen shyǵýǵa múmkindik beredi. Eńbekke qaýqarly azamattardy jumyspen qamtýǵa jaǵdaı jasalady. Mundaı otbasylardy anyqtaý úshin búginde aýdanda arnaıy komıssııa qurylyp, onyń quramyna aýyl aqsaqaldary men jergilikti belsendiler engizilgen.