Saryaǵash aýdanynda stýdentterge arnalǵan 100 oryndyq jataqhana ashyldy

TÚRKІSTAN. QazAqparat – Túrkistan oblysynyń Saryaǵash aýdanynda jańadan stýdentter jataqhanasy ashyldy. Aýdandaǵy «Arystanbab» joǵary kolledjinde paıdalanýǵa berilgen jataqhana zamanaýı úlgide salynyp, barlyq jabdyqpen qamtamasyz etilgen, dep habarlaıdy QazAqparat tilshisi.

Bir jyl ishinde salynyp bitken ǵımarattyń saltanatty ashylý rásimine aýdan ákimi Muhıt Otarshıev arnaıy qatysyp, jataqhanany aralap kórdi. 100 orynǵa laıyqtalǵan eki qabatty nysannyń árbir bólmesi tórt adamǵa arnalǵan. Bólmelerdiń ishi jıhazben jabdyqtalyp, jýynatyn bólme salynǵan. Sharada aýdan ákimi jańa jataqhananyń salynýy stýdentter úshin mańyzdy ekenin atap ótti.

«Aýdanda jastarǵa sapaly bilim berip, olarǵa jaǵdaı jasaý barysynda júıeli jumystar júrgizilýde. Bul kolledjde bilim alyp jatqan stýdentter úshin qýanyshty oqıǵa bolyp otyr. Jańa ǵımarat stýdentterdiń oqýyna jəne óz ýaqyttaryn jaıly jaǵdaıda ótkizýge múmkindik beredi. Osyndaı jaǵdaı jasalǵan oqý ordasynyń stýdentteri bilimdi jáne bilikti maman bolatynyna senimdimin», - dedi Muhıt Otarshıev.

Aıta keteıik, qazirgi tańda atalǵan kolledjde jastar 12-gýmanıtarlyq jáne medıtsınalyq mamandyq boıynsha bilim alýda. Myńnan asa stýdentke 70-ten asa oqytýshy dáris beredi.