Saryaǵash aýdanynda sandyq jobalar iske qosylady

TÚRKІSTAN. QazAqparat - Túrkistan oblysy, Saryaǵash qalasynda «Tsıfrly Qazaqstan» memlekettik baǵdarlamasy aıasynda kezdesý ótti. Jıyn barysynda «Túrkistan» ÁKK» AQ-nyń «Tsıfrlandyrý ortalyǵy» fılıaly men Saryaǵash aýdany ákimdigi arasynda yntymaqtastyq jóninde memorandým jasaldy, dep habarlaıdy QazAqparat tilshisi.

«Túrkistan oblysyndaǵy tsıfrlandyrý ortalyǵynyń» dırektory Asylbek Janǵulovtyń aıtýynsha, mundaı qujattar tyń jobalardy júzege asyrýda jańa múmkindikter beredi.

«Oblysta sandyq formatqa kóshý boıynsha qarqyndy jumystar júrgizilip jatyr. Máselen, qazirgi kúni densaýlyq saqtaý, bilim berý, qaýipsizdik, transport jáne turǵyn úı-kommýnaldy sharýashylyǵy sııaqty bes salada 27 joba júzege asyrylýda. Bizdiń fılıaldyń bir aı buryn ashylǵanyna baılanysty, ázirge, atalǵan qujattardy ázirleýge kelisim bergen alǵashqy aýdan Saryaǵash bolyp otyr. Aldaǵy ýaqytta mundaı kelisimder Túrkistandaǵy barlyq aýdan, qalalardyń ákimdigimen jasalyp, jumystardy birlese atqaramyz», - dedi Asylbek Janǵulov.