Saryaǵash aýdanynda anasy baılap ustaǵan 2 jasar búldirshin aýrýhanada jatyr

Keles aýdandyq aýrýhanasy dárigerleriniń sózinshe, búldirshin 16-shy qańtardan beri emdeý mekemesine jatqyzylǵan.

«Sadyq Abdynur 2020 jyldyń 16 qańtarynda Keles aýdandyq aýrýhanasynyń balalar bólimine jatqyzylǵan. Malabsorbtsııa dıagnozy qoıylǵan bala qazir em qabyldap jatyr. Jaǵdaıy ortasha aýyr, biraq turaqty», - delingen dárigerlerdiń habarlamasynda.

Aıta keteıik, búgin zańger Qurmanǵazy Músir óziniń Facebook áleýmettik jelisindegi paraqshasynda balanyń ákesine kómektesip jatqanyn, búldirshinniń qatty naýqastanyp qalǵanyn jazǵan bolatyn.

«Búldirshinniń ákesi ulynyń túni boıy jylaǵanyn, tipti dene qyzýy 39,5° deıin kóterilgenin aıtty. Medıtsınalyq tekserýler júrgizgen dárigerler balaǵa »Malabsortsııa« degen dıagnoz qoıǵan. Bul aýrý túri baýyr men asqazan qyzmetiniń buzylýyn, olardyń úlkeıgenin kórsetedi» delingen paraqshada.

Zańger sondaı-aq, ákesiniń quqyn qorǵaý úshin Saryaǵash aýdandyq prokýratýrasyna baratynyn aıtqan. Bul máselege oraı aýdandyq prokýratýra qyzmetkerleri balaǵa sot-medıtsınalyq saraptama júrgizilip, denesinen eshbir uryp-soǵý belgileri anyqtalmaǵanyn aıtady. Ákesi balanyń baılaýly turǵan jerin túsirgennen keıin, perzentin úıine áketip qalǵan bolyp shyqty. Sodan beri anasy balasyn qaıtara almaı, onyń qorǵaýshysy prokýratýraǵa aryz túsirgen.

Eske salaıyq, buǵan deıin áleýmettik jelide 2 jasar búldirshinniń aýzy tumshalanyp, qoly baılaýly otyrǵany týraly beınejazba tarap ketken bolatyn. Keıinnen bul jaǵdaı Saryaǵash aýdanynda tirkelgeni anyqtaldy.

Búldirshinniń ata-anasy ajyrasyp ketkennen keıin, bala anasynda qalǵan. Ony kórýge kelgen ákesi balasynyń baılaýly turǵanyn baıqap, uıaly telefonyna túsirip alǵan. Qazirgi tańda bul is boıynsha quzyrly organdar tekserý sharalaryn júrgizýde. Al, ata-anasy balasyna talasyp, sotqa aryzdanyp jatyr.