Saryaǵash aýdanynda «Altyn kúz-2019» merekesi atalyp ótti
TÚRKІSTAN. QazAqparat – Túrkistan oblysy, Saryaǵash aýdanynda aýyl sharýashylyǵy eńbekkerlerine arnalǵan «Altyn kúz-2019» merekesi atalyp ótti.
Sharaǵa sharýalar men dıhandardan bólek aýyl sharýashylyǵy salasynyń ardagerleri, eńbek ozattary qatysty, dep habarlaıdy QazAqparat tilshisi.
Saltanatty sharada aýdan ákimi Muhıt Otarshıev qatysyp, búgingi tańda aýdan ekonomıkasynyń negizgi tiregi aýyl sharýashylyǵy salasy bolyp otyrǵanyn atap ótti.
«Aýyl sharýashylyǵy salasyn damytýǵa jyldan-jylǵa memlekettik qoldaýlar kórsetilip, joǵary nátıjelerge qol jetkizýdemiz. Osy jeńisterdiń barlyǵy dıqanshylar Sizderdiń ala jazdaı etken eńbekterińizdiń nátıjesi ekenin atap ótý kerek», – dedi aýdan ákimi.
Ákim joǵary kórsetkishke qol jetkizgen sharýalardy arnaıy alǵys hattar jáne baǵaly syılyqtarmen marapattady. Merekelik sharaǵa qatysqan aýdandyq máslıhattyń hatshysy men aýdandyq ardagerler keńesiniń tóraǵasy da barsha aýyl sharýashylyǵy salasynyń mamandaryn quttyqtady. Osy salada sińirgen eńbekteri men joǵarǵy deńgeıdegi atqarylǵan jumystary úshin dıhandar jáne mamandar arnaıy alǵys hattarmen marapattaldy. Saltanatty is-shara sońy aýdandyq mádenıet úıiniń ónerpazdarynyń án-shashýymen jalǵasyn tapty.
Aıta keteıik, aǵymdaǵy jyly aýdan dıqanshylarynyń qarjyly eńbeginiń nátıjesinde aýyl sharýashylyǵy salasynyń jalpy ónim kólemi 66 mlrd 695 mln teńgeni quraǵan. 65 594 gektar jerge egis egilip, búgingi tańǵa osy egis alqaptarynda óndirilgen ónim tolyq jınalyp alyndy. Egin jáne mal sharýashylyǵy boıynsha oblys kóleminde aıtarlyqtaı jetistikterge qol jetkizildi.
