Saryaǵash aýdanynda 8 eldi meken tabıǵı gazben qamtamasyz etildi

ASTANA. QazAqparat - Ulystyń uly kúni - Naýryz merekesi qarsańynda Ońtústik Qazaqstan oblysynyń ákimi Janseıit Túımebaev jumys saparymen Saryaǵash aýdanynda bolyp, birqatar nysandardy aralady.

Aldymen, aımaq basshysy Saryaǵash qalasyndaǵy 36 páterli kóp qabatty turǵyn úıdiń saltanatty ashylý rásimine qatysyp, páter kiltterin tapsyrdy. Sondaı-aq shara barysynda oblys basshysy Uly Otan soǵysynyń ardageri Aleksandr Denısenkonyń úıine kirip, qýanyshymen bólisti.

«Biz sizderdi árqashan maqtan tutamyz, qurmetteımiz. Sizder tarıhtyń altyn qazynasysyzdar. Naýryz merekesi qarsańynda barlyqtaryńyzǵa zor densaýlyq, uzaq ǵumyr, baıandy baqyt, otbasylaryńyzǵa amandyq pen jaqsylyq tileımin. Jańa baspanalaryńyz jaıly bolyp, shańyraqtaryńyz shattyqqa tolsyn»,-dedi Janseıit Qanseıituly.

Óz kezeginde qart maıdanger Elbasy tarapynan jasalyp jatqan jan-jaqty qoldaý jumystaryna óz rızashylyǵyn bildirip, alǵysyn jetkizdi.
«Elbasy tapsyrmasyna sáıkes bizge degen qurmet pen jaqsylyqtaryń úshin shyn júregimnen osynda otyrǵan barlyq turǵyndardyń atynan rahmet aıtamyn. Búgingi urpaq baqytty kezeńde ómir súrip jatyr. Osy beıbit kezeń árdaıym uzaǵynan bolsyn!»- dedi Uly Otan soǵysynyń ardageri Aleksandr Denısenko.

Aıta keteıik 2015 jyldyń shilde aıynda qurylysy bastalǵan kóp qabatty turǵyn úı qurylysyna oblystyq bıýdjetten 250 mln. teńge jumsalǵan. Qurylys jumystaryn «Ońtústik qurylys kompanııasy» JShS júrgizgen.
Jalpy Saryaǵash aýdany boıynsha turǵyn úıge óz sanattaryna qaraı 2170 adam kezekte tur. Qazirgi tańǵa aýdan turǵyndaryn baspanamen qamtamasyz etý maqsatynda 10,0 ga jerge 5 qabatty 45 páterli 13 turǵyn úıdiń jobalyq-smetalyq qujattaryn ázirleýge memlekettik satyp alý baıqaýy jarııalanǵan.

Munan soń aımaq basshysy Aqtóbe aýyldyq okrýginiń Aqjar eldi mekeninde tabıǵı gaz jelisine qosý saltanatyna qatysty.
Saryaǵash aýdany Aqtóbe aýyldyq okrýgindegi gaz ótkizgishtiń qurylysy aıaqtalǵaly 9428 turǵyny bar 8 eldi meken tabıǵı gazben qamtamasyz etilgen. Osylaısha 1327 otbasy kógildir otyndy paıdalanýǵa múmkindik aldy.

Tabıǵı gaz ótkizgishtiń qurylys-montaj jumystaryna oblystyq bıýdjetten 991 mln. 372 myń teńge jumsaldy. Qurylys jumystaryn«CK MEGARON» JShS júrgizgen.

Jalpy aýdan boıynsha 154 eldi mekenniń 74-i tabıǵı gazben qamtylyp otyr, dep habarlaıdy OQO ákiminiń baspasóz qyzmeti.