Saryaǵash aýdanynda 26 emdik-saýyqtyrý ortalyǵy jumys isteıdi
ASTANA. QazAqparat - Ońtústik Qazaqstan oblysy Saryaǵash aýdanynda mıneraldy jáne termaldy sýlardy paıdalaný arqyly saýyqtyrý týrızmi damyp keledi, dep habarlaıdy oblystyq ákimdiktiń baspasóz qyzmeti.
Shıpaly sýymen álemge tanylǵan Saryǵash kýrortyna kelip em alýshylardyń sany jyl ótken saıyn artyp keledi. Qazirgi tańda atalǵan aýdanda 26 emdik-saýyqtyrý ortalyqtary qyzmet kórsetse, olarda ótken jyly 84 myńnan astam adam em alyp, dertterine shıpa tapqan.
Búginde saýyqtyrý týrızmin damytý maqsatynda «Saryaǵash» kýrort aýmaǵynda birqatar jobalardy iske asyrý josparlanyp otyr. Sonymen birge at týrızmi, velotýrızm men mádenı-tarıhı týrızmdi damytý alǵa qoıylǵan maqsattardyń biri.
Aýdandyq ákimdiktiń habarlaýynsha, kýrort aýmaǵynan jeke ınvestorlar esebinen jalpy quny 9 710,0 mln teńgeni quraıtyn 9 joba iske asyrylý josparlanýda. Nátıjesinde 600 jańa jumys orny ashylady dep kútilýde. Jobada shıpajaı, qonaq úı, avtoturaq, ashyq jáne jabyq basseın, spa-ortalyq pen konferents-zal qarastyrylǵan.
Al ótken jyly týrızm salasy boıynsha jalpy quny 635 mln teńge bolatyn 3 joba iske qosylyp, 128 jumys orny ashyldy.
