Saryaǵash aýdanynda 250 gektardan astam jer memleket qoryna qaıtaryldy
SARYAǴASh. QazAqparat - Túrkistan oblysy Saryaǵash aýdanynda aýylsharýashylyǵy maqsatyndaǵy jerlerdi paıdalanbaı jatqan tulǵalardy anyqtaý úshin monıtorıng jumystary júrgizilgen. Nátıjesinde 157 azamat tarapynan 8689,66 gektar jerdiń ıgerilmeı jatqany anyqtalǵan, dep habarlaıdy QazAqparat tilshisi.
Sala mamandary turǵyndar arasynda túsindirý jumystaryn júrgizip, nátıjesinde 86 azamat 6427,66 gektar jerin ıgere bastaǵan. Al, 14 adamnyń 251,42 gektar jeri memleketke qaıtarylǵan.
Qazirgi tańda, qalǵan tulǵalardyń ıgerilmeı jatqan jerleri boıynsha tıisti jumystar júrgizilip jatyr. Jalpy, aýdanda aǵymdaǵy jyldyń 11 aıynda jer telimderin jalǵa berýden túsetin túsim 11 mln 741 myń teńge bolyp josparlansa, qazir bul kórsetkish 10 mln 574,8 myń teńgege oryndalǵan.
Aıta keteıik, jyl basynan beri aýyl sharýashylyǵy maqsatyndaǵy jerlerge 4 ret konkýrs ótkizilgen. Nátıjesinde 62 jeke jáne zańdy tulǵalarǵa 5544,3 gektar aýyl sharýashylyǵy maqsatyndaǵy jer telimi jalǵa berilip, qaıta aınalymǵa engizilgen.
