Saryaǵash aýdanynda 13 nysan el ıgiligine berildi
TÚRKІSTAN. QazAqparat - Túrkistan oblysyna qarasty Saryaǵash aýdanynda bir kúnde 13 nysan iske qosyldy. Jańadan ashylǵan nysandardyń ashylý rásimine Saryaǵash aýdanynyń ákimi Qaırat Amankeldiuly qatysyp, aýdan turǵyndaryn aıtýly qýanyshpen quttyqtady, dep habarlaıdy QazAqparat tilshisi.
Aýdan basshysy aldymen Jibek joly aýyldyq okrýgine qarasty Jańaqurylys eldi mekeninde ornalasqan 125 oryndyq «Aısha apa» balabaqshasynyń saltanatty ashylý rásimine qatysty. Balabaqsha qurylysy 2018 jyly bastalyp, 2019 jyldyń qańtar aıynda tapsyrylyp otyr. Nysanǵa tartylǵan jeke ınvestıtsııa kólemi 160 mln teńgeni quraıdy. Bóbekjaıda 23 adam turaqty jumyspen qamtylyp, ortasha 45 myń teńge jalaqy alady.
Bul kúni sondaı-aq, Qaplanbek oqý sharýashylyǵynda «Er esimi - el esinde» atty alleıa saltanatty túrde ashyldy. Atalǵan alleıa «Rýhanı jańǵyrý» baǵdarlamasy aıasynda qaıta qalpyna keltirilip otyr. Shara barysynda ekinshi dúnıejúzilik soǵysy jyldary erlik kórsetken jaýyngerlerdiń rýhyna quran baǵyshtaldy. Osyndaı ıgilikti is atalǵan alleıanyń janynan 900 orynǵa arnalǵan №4 ıÝrıı Gagarın atyndaǵy mekteptiń ashylýymen jalǵasyn tapty. 2017 jyldyń qarasha aıynda bastalǵan qurylys 2018 jyldyń jeltoqsan aıynda aıaqtalǵan. Budan ózge, aýdanda jergilikti bıýdjettiń qarajaty esebinen medıtsınalyq tirek paıdalanýǵa berildi.
Sondaı-aq, aımaqta úsh aýysymdy mekteptiń sany qysqaryp, Tegisshil aýyldyq okrýgindegi №49 M.Jumabaev atyndaǵy mektep jóndeýden ótti. Sonymen qatar, Maıdabozaı, Bekbota, Aşykól, Qalǵansyr, Kópqudyq, Baıǵabyl eldi mekenderinde 10/0,4 kV elektr jelileriniń qurylysy aıaqtalǵan nysandar iske qosyldy. Joba boıynsha 6 eldi mekendegi 613 turǵyn úı sapaly elektr qýatymen qamtamasyz etiledi.
