«Sary» jáne «jasyl» aımaqtarda «Ashyq» qosymshasyn qoldaný talaby alynyp tastaldy
NUR-SULTAN. QazAqparat – COVID-19 taralýyna jol bermeý jónindegi VAK shekteýlerdi alyp tastaý boıynsha birqatar sheshim qabyldady. Sonyń ishinde óńirlerde «Ashyq» mobıldi qosymshasyn mindetti túrde qoldaný talaby da alyndy, dep habarlaıdy QazAqparat.
Bundaı sheshim QR Premer-Mınıstriniń orynbasary Eraly Toǵjanovtyń tóraǵalyǵymen Qazaqstan Respýblıkasynyń aýmaǵynda koronavırýs ınfektsııasynyń taralýyna jol bermeý jónindegi vedomstvoaralyq komıssııanyń otyrysynda qabyldandy.
Eldegi epıdemıologııalyq jaǵdaıdyń turaqtanýyn eskere otyryp, Qazaqstan Respýblıkasynyń aýmaǵynda koronavırýs ınfektsııasynyń taralýyna jol bermeý jónindegi vedomstvoaralyq komıssııa sheshimine saı, epıdemıologııalyq táýekeldiń «sary» jáne «jasyl» aımaqtarynda ornalasqan óńirlerdegi barlyq obektilerde «Ashyq» mobıldi qosymshasyn mindetti túrde qoldaný alynyp tastaldy.
Sondaı-aq, áleýmettik qashyqtyqty saqtaýǵa qoıylatyn talaptar, mindetti termometrııa talaby da kúshin joıdy.
