«Sary» jáne «qyzyl» statýsy bar astanalyqtardyń Býrabaıǵa demalýǵa kelgeni anyqtaldy
KÓKShETAÝ. QazAqparat - Aqmola oblysynyń Býrabaı kentindegi «Dostar» dámhanasynda «sary» jáne «qyzyl» statýsy bar kelýshiler anyqtaldy, dep habarlaıdy QazAqparat tilshisi oblystyq sanıtarlyq-epıdemıologııalyq baqylaý departamentiniń baspasóz qyzmetine silteme jasap.
Vedomstvonyń málimetinshe, ótken táýlikte ASHYQ jobasynyń kómegimen Býrabaı kentiniń «Dostar» dámhanasynda «sary» statýsy bar (koronavırýs juqtyrǵan adammen baılanysta bolǵan adam) jáne «qyzyl» statýsy bar (COVID-19 naýqas) kelýshiler anyqtaldy.
«Kelýshiler Nur-Sultan qalasynyń turǵyndary, olar úı karantıninde bolýy kerek edi. Aqmola oblysy sanıtarlyq-epıdemıologııalyq baqylaý departamentiniń qyzmetkerleri úı karantınin buzýshylarmen karantındik rejımdi saqtaý týraly túsindirý jumystaryn júrgizdi jáne turǵylyqty mekenjaıy boıynsha Nur-Sultan qalasynyń sanıtarlyq-epıdemıologııalyq baqylaý departamentine sharalar qabyldaý úshin aqparat jiberdi», - dedi vedomstvodan.
Departament mamandary atap ótkendeı, ótken táýlikte Aqmola oblysynda koronavırýstyq ınfektsııanyń 130 jaǵdaıy anyqtaldy. Olardyń basym bóligi-109 adam sımptomatıkalyq. Kúndelikti ósim 0,6 paıyzǵa teń. Aýrý jaǵdaılary Býrabaı aýdanynda (31), Kókshetaý qalasynda (28), Bulandy (19), Arshaly (11), Sandyqtaý (7), Shortandy jáne Jaqsy (6 jaǵdaıdan), Atbasar (5), Aqkól (4), Tselınograd, Zerendi aýdandarynda jáne Stepnogorsk qalasynda (3 jaǵdaıdan), Astrahan (2), Esil jáne Jarqaıyń aýdandarynda (1 jaǵdaıdan) tirkeldi. Sońǵy aptada óńirde koronavırýs juqtyrýdyń 938, aldyńǵy aptada 953 jaǵdaıy tirkelgen. ıAǵnı, 1,02 ese tómendeý baıqalady (15 jaǵdaıǵa az).
