Sary nómirli kólikterdi Armenııaǵa barmaı tirkeýden shyǵarý máselesi pysyqtalýda - ІІM

ASTANA. QazAqparat – Іshki ister mınıstrligi Syrtqy ister mınıstrligimen birlesip sary nómirli kólikterdi Armenııa tirkeýinen qashyqtan shyǵarýdyń joldaryn qarastyryp jatyr, dep habaralaıdy QazAqparat tilshisi.

Bul týraly Іshki ister mınıstriligi Ákimshilik polıtsııa komıtetiniń erekshe tapsyrmalar jónindegi aǵa ınspektory Altynbek Jamalıev aıtty.

«Armenııa Respýblıkasynan ákelingen, ýaqytsha esepke qoıylǵan jáne sary memlekettik tirkeý nómiriniń belgilerin alǵan kólik quraldaryn zańdastyrý jan-jaqty júrgizilýde.Sonyń nátıjesinde aq memlekettik tirkeý nómiriniń belgisin alý múmkindikteri bar. Іshki ister mınıstrligi Armenııa Respýblıkasyndaǵy áriptesterimen birlesip osy máseleni qashyqtyqtan sheshý jáne kólikterdi ol jerdegi esepten shyǵarýdy pysyqtap jatyr», - deıdi aǵa ınspektor.

Eske salsaq, sheteldik kólikterdi zańdastyrý 23 qańtarda bastalady.