Sary maıdyń paıdasy men zııany
ASTANA. QazAqparat - Qazirgi tańda sarymaı tóńireginde pikirtalas kóp. Bireýler ony densaýlyqqa qaýipti taǵam dese, endi biri sarymaıdy tamaq ratsıonynan múldem alyp tastaý odan da qaýipti ekendigin alǵa tartady, dep jazady arular.kz.
Quramy
Sarymaı mıneraldy zattarǵa baı taǵam. Onyń quramynda kalıı, fosfor, kaltsıı, natrıı, selen, magnıı, temir, myrysh, mys jáne marganets bar. Oǵan qosa, keıbir túrleriniń quramynda A, E jáne K dárýmenderimen qatar, RR, V1, V2, V5 jáne D dárýmenderin de kezdestirýge bolady.
Deı tura, sarymaıdyń quramyndaǵy maı úlesi adam aǵzasyna qajetti shamadan 2,5 ese kóp ekendigin eskerý kerek. Osy jaǵdaı holesterınge de qatysty.
Zııany:
- Sarymaı dene salmaǵy artyq adamǵa, álbette zııanyn tıgizetin taǵam.
- Sút ónimderine, sonyń ishinde sıyr sútine allergııasy bar jandarǵa sarymaıdy tutynbaǵan abzal.
- Sarymaıdan aýlaq bolýdyń taǵy bir sebebi - onyń quramyndaǵy holesterın mólsheriniń tym joǵarý bolýy.
Paıdasy:
Áıel aǵzasynda holesterın jetispegen kezde, bul ony bedeýlikke alyp keledi. Oǵan qosa, maıdy az tutyný - menopaýza ýaqytyn jaqyndata túsedi.
Óziniń tamaq ratsıonyna qajetti mólsherde sarymaı qosqan adamnyń asqazanyndaǵy kishkentaı jaralar jazyla bastaıdy. Sondyqtan asqazany aýyratyn adamdarǵa sarymaıdan bas tartpaǵan jón.
Kúnine jelingen 50 gramm maı kóz ben súıek saýlyǵyna kepil bola alady. Sarymaı adamnyń ımmýnıtetin kúsheıtip, belsendiligin arttyra túsedi.
Aǵzaǵa qajetti mólsheri
Sarymaıdyń zııany men paıdasyn bir tarazy basyna qoısaq, paıdasy basymdyraq ekendigine kóz jetkizýge bolady. Sarymaıdan múldem bas tartý, densaýlyqqa aıtarlyqtaı zııanyn tıgizedi. Biraq eger Siz kúndelikti tamaq ratsıonyna 30 gramm sarymaı qosatyn bolsańyz, bul sizdiń symbatyńyzǵa esh qaýip tóndirmeı, aǵzańyzdyń saý bolýyna kómektesedi.
