Sársenbige arnalǵan aýa raıy boljamy
ASTANA. QazAqparat -Respýblıkanyń batys jáne ońtústik oblystarynda turaqsyz aýa raıy saqtalady, keı jerlerde jaýyn-shashyn jaýyp, kóktaıǵaq kútiledi, jel kúsheıedi, batysta jaıaý burqasyn bolady, al qalǵan aımaqtarda jaýyn-shashynsyz aıazdy aýa raıy saqtalady. Bul týraly QazAqparat Qazgıdrometke silteme jasap habarlaıdy..
Respýblıkanyń keı jerlerinde tuman saqtalady. Batys Qazaqstan oblysynyń keı jerlerinde tuman, kóktaıǵaq, jaıaý burqasyn bolyp, jel 17-22 m/s kúsheıedi. Aqtóbe oblysynyń keı jerlerinde jaıaý burqasyn bolyp, jel 18 m/s kúsheıedi.
Mańǵystaý, Qyzylorda, Túrkistan, Atyraý oblystarynyń keı jerlerinde tuman, kóktaıǵaq bolyp, jeldiń kúshi 15-20 m/s jetedi.
Almaty, Shyǵys Qazaqstan oblystarynyń keı jerlerinde tuman, kóktaıǵaq kútiledi. Túnde Almaty oblysynyń soltústiginde óte qatty aıaz kútiledi, Shyǵys Qazaqstan oblysynda, Soltústik Qazaqstan, Pavlodar oblystarynyń keı jerlerinde qatty aıaz kútiledi.
