Sársenbi kúni Qazaqstannyń basym bóliginde naızaǵaı jarqyldap, jańbyr jaýady, jel kúsheıedi
ASTANA. QazAqparat - Sárseni kúni, 4 maýsymda respýblıkanyń soltústiginde, soltústik-batysynda jáne ortalyǵynda atmosferalyq aǵyndardyń ótýimen turaqsyz aýa raıy kútiledi, naızaǵaı jarqyldap, jańbyr jaýady, jel kúsheıedi. Qazaqstannyń qalǵan aýmaǵynda kún raıy ashyq bolady.
Bul týraly «Qazgıdrometke» silteme jasap, QR TJM baspasóz qyzmeti habarlady.
Aqmola, Almaty, Ońtústik Qazaqstan, Qostanaı, Soltústik Qazaqstan, Pavlodar, Qaraǵandy, Shyǵys Qazaqstan oblystarynda, kúndiz Jambyl oblysynda keı jerlerde jeldiń ekpini 15-20 m/s-qa deıin kúsheıedi. Mańǵystaý oblysynda keı jerlerde jeldiń 15-20 m/s-qa deıin kúsheıip, shańdy daýyl kóterilýi kútilýde.
Túnde Qaraǵandy oblysynda keı jerlerde topyraq qabatynyń 0 gradýstan 2 gradýske deıin sýytýy saqtalady.
Kúndiz Batys Qazaqstan oblysynda keı jerlerde aptap ystyq bolady.
Respýblıkanyń batysynda, ońtústiginde jáne ortalyǵynda keı jerlerde tótenshe joǵary órt qaýpi saqtalady.
