Sársenbi kúni elimizdiń batysy men soltústiginde jel kúsheıip, kóktaıǵaq bolady
ASTANA. QazAqparat - 26 qarashada elimizdiń batys, soltústik-batys jáne soltústiginde frontaldy aýa bólikteriniń ótýine baılanysty keı jerlerinde jaýyn-shashyn saqtalady, burqasyn, tuman, kóktaıǵaq bolyp, jel kúsheıedi.
Respýblıkanyń qalǵan aımaqtarynda aýa raıy jaýyn-shashynsyz bolyp kútiledi, dep habarlaıdy «Qazgıdromet» RMK.
Soltústik Qazaqstan oblysynyń keı jerlerinde tuman túsip, kóktaıǵaq bolady, burqasyn soǵady. Jeldiń 15-20 m/s deıin kúsheıýi kútiledi. Qostanaı, kúndiz Pavlodar oblystarynyń keı jerlerinde jel 15-22 m/s kúsheıip, kóktaıǵaq, tuman kútiledi. Almaty oblysynda túnde jáne tańerteń tuman kútilip, Jalańashkól aýdanynda jel 18-23 m/s kúsheıedi. Shyǵys Qazaqstan oblysynyń keı jerlerinde jel 15-20 m/s kúsheıip, túnde keı jerlerinde tuman túsedi. Mańǵystaý oblysynyń keı jerlerinde tuman kútilip, túnde jel 15-20 m/s deıin kúsheıedi. Aqmola, Batys Qazaqstan oblystarynyń keı jerlerinde tuman, kóktaıǵaq baqylanady. Atyraý, Aqtóbe, Jambyl, Ońtústik Qazaqstan, Qyzylorda oblystarynyń keı jerlerinde tuman túsedi.
