Sársenbi kúni demalýdyń paıdasy kóp - zertteý
NUR-SULTAN. QazAqparat - Avstralııanyń birneshe kompanııasy apta saıyn sársenbi kúninde qyzmetkerlerine demalys beredi. VVSbasylymynyń jazýynsha, tórt kúndik jumys aptasymen jumys istese de, olarǵa tolyq jalaqy tólenedi.
«Mundaı kompanııalar dúısenbi, seısenbi jumys istep, sársenbi demalady. Sodan keıin beısenbi, juma jumysqa shyǵyp, senbi, jeksenbi qaıta demalady. Kompanııa basshylyǵynyń aıtýynsha, mundaı kún tártibi qyzmetkerlerdiń jumysyn tıimdi uıymdastyrýǵa áser etken», dep jazady basylym.
Avtordyń aıtýynsha, mundaı júıe byltyr shilde aıynda engizilgen. Sol ýaqyttan beri avstalııalyq kompanııanyń tabysy 46% kóbeıgen.
«Basynda tájirıbe engizdik. Eger nátıje bolmasa, burynǵy jumys tártibine kóshetinimizdi aıttyq. Degenmen, qazir qyzmetkerlerdiń densaýlyǵyna baılanysty demalys alýy azaıdy, kóńil kúıleri jaqsardy»,- depti kompanııa basshylyǵy.
Maqala avtorynyń jazýynsha, Djarrod Haar esimdi professor da tórt kúndik jumys aptasynyń sátti bolatynyn, ásirese sársenbi kúni demalýdyń paıdasy kóp ekenin anyqtaǵan.
«Jańa Zelandııadaǵy Oklend tehnologııalyq ýnıversıtetiniń adam resýstaryn basqarý professory Djarrod Haardyń aıtýynsha, apta ortasynda demalý qyzmetkerlerdiń sergektigi men jumys ónimdiligin saqtap qalady. Kóp jaǵdaıda beısenbi kúnge qaraı qyzmetkerlerdiń kóbi ózin sharshańqy sezinedi. Al sársenbi kúngi demalys oǵan jol bermeıdi», dep jazady basylym.
Avtordyń aıtýynsha, ekonomıst Djon Meınard Keıns 1930 jyly jumys aptasy 15 saǵatqa deıin qysqaratynyn boljaǵan. Shamamen júz jyl ótken soń kópshiligi jumys aptasynyń quylymyn qaıta qarastyryp jatyr.
