Sársenbaı Eńsegenov: Beıbit jınalystardy ótkizý tártibi naqtylanady
NUR-SULTAN. QazAqparat – Parlament Senaty Konstıtýtsııalyq zańnama, sot júıesi jáne quqyq qorǵaý organdary komıtetinde «Qazaqstan Respýblıkasynda beıbit jınalystardy uıymdastyrý jáne ótkizý tártibi týraly» zań jobasy pysyqtalyp jatyr, dep habarlaıdy QazAqparat.
Senattyń baspasóz qyzmetiniń málimetinshe, Májiliste maquldanǵan zań jobasyn joǵarǵy palatada odan ári qaraýǵa Senat depýtaty Sársenbaı Eńsegenov jaýapty bolyp belgilendi. Konstıtýtsııalyq zańnama, sot júıesi jáne quqyq qorǵaý organdary komıtetiniń tóraǵasy Vladımır Volkovtyń aıtýynsha, senatorlar 17 sáýirde zań jobasyn ázirleýshilermen birge jumys tobynyń alǵashqy otyrysyn ótkizdi.
Qujatqa jaýapty S.Eńsegenov «Qazaqstan Respýblıkasynda beıbit jınalystardy uıymdastyrý jáne ótkizý tártibi týraly» zańynyń jobasyn ázirleý kezinde halyqaralyq tájirıbeler muqııat zerdelenip, eskerilgenin atap ótti. Senator sondaı-aq bul zań jobalary Qazaqstan azamattarynyń Konstıtýtsııada bekitilgen beıbit jáne qarýsyz jınalyp, pıketke shyǵý, jınalys, mıtıngiler, demonstratsııa men sherý ótkizý kezindegi týyndaıtyn qoǵamdyq qatynastardy retteýge baǵyttalǵanyn jetkizdi.
«Qujatta beıbit jınalystardy uıymdastyrý jáne ótkizýdiń negizgi qaǵıdattary belgilengen. Olar birinshiden zańdylyq, beıbit jınalystarǵa azamattardyń qatysýynyń eriktiligi, beıbit jınalystar ótkizý kezinde kúsh qoldanbaý sıpatynda bolýy, beıbit jınalystardy ótkizý paıdasyna prezýmptsııasy jáne taraptardyń jaýapkershiligi, memlekettik qaýipsizdikti, qoǵamdyq tártipti, densaýlyq saqtaýdy, basqa adamdardyń quqyqtary men bostandyqtaryn qamtamasyz etýi», - dedi S.Eńsegenov.
Senator zań jobasynda beıbit jınalystardy ótkizýge qatysty habarlama, ótinish berý jáne olardy qaraý merzimi naqtylanǵanyn aıta kelip, jergilikti ókildi organdar beıbit jınalystardy ótkizý úshin arnaıy oryn belgileýi qajet ekenin jáne ol oryndar eldi mekenderdiń shetinde emes, ortalyǵynda bolýy naqty jazylǵanyn habarlady.
S.Eńsegenov «Qazaqstan Respýblıkasynda beıbit jınalystardy uıymdastyrý jáne ótkizý tártibi týraly» zań jobasyna qosymsha ilespe qujat ta daıyndalǵanyn atap ótti.
«Іlespe zań qoldanystaǵy zańnamaǵa ózgerister men tolyqtyrýlar engizýdi kózdeıdi. ıAǵnı, 3 kodeks pen 8 zańǵa ózgerister engiziledi. Bul engiziletin ózgerister «Qazaqstan Respýblıkasynda beıbit jınalystardy uıymdastyrý jáne ótkizý tártibi týraly» zańda kózdelgen sharalardy iske asyrýǵa baǵyttalǵan», - dedi depýtat.
Aıta keteıik, búgin Senatta depýtat Vladımır Volkovtyń tóraǵalyq etýimen Konstıtýtsııalyq zańnama, sot júıesi jáne quqyq qorǵaý organdary komıtetiniń keńeıtilgen otyrysy ótti. Onda «Qazaqstan Respýblıkasynda beıbit jınalystardy uıymdastyrý jáne ótkizý tártibi týraly» jáne «Qazaqstan Respýblıkasynyń keıbir zańnamalyq aktilerine Qazaqstan Respýblıkasynda beıbit jınalystardy uıymdastyrý jáne ótkizý tártibi máseleleri boıynsha ózgerister men tolyqtyrý engizý týraly» zań jobalary qaraldy.
