Sarkozı túrme tamaǵynan qaýiptenip, tek ıogýrt jeıdi

ASTANA.KAZINFORM - Prezıdent naýqanyn qarjylandyrý isi boıynsha aıyptalyp, jazasyn ótep jatqan Frantsııanyń burynǵy prezıdenti Nıkolıa Sarkozı túrme tamaǵynan bas tartyp, tek ıogýrt jeıdi, dep habarlaıdy TASS. 

Le Point jýrnalynyń habarlaýynsha, Sarkozı basqa tutqyndar onyń tamaǵyna áldene qosyp jiberýi múmkin dep qorqady. Sondaı-aq ol túrme dúkeninen de azyq-túlik alý múmkindigin paıdalanbaıdy.

- Ol tipti jumyrtqa da asyp jemeıdi jáne muny prıntsıp boıynsha jasaıdy, - dep atap ótti derekkóz.

21 qazanda qamaýǵa alynǵannan beri burynǵy prezıdent tek ıogýrtpen kún kórip keledi. Jýrnal bul dıeta onyń advokattarynyń 10 qarashada bosatý týraly ótinishin qarastyratyn sýdıalarǵa qalaı áser etýi múmkin ekeni týraly oılap kórdi.

Eger ótinish qanaǵattandyrylsa, Sarkozıdiń túrme jazasy sot baqylaýymen, elektrondy bilezikpen nemese kepildikpen aýystyrylýy múmkin.

Buǵan deıin Parıj prokýratýrasy Sarkozıge túrmede jasalǵan qoqan-loqqylardy tergep jatqany habarlanǵan bolatyn. Burynǵy prezıdentke jasalǵan ólim qaýpinen keıin úsh tutqynǵa qatysty tergeý bastaldy.

Esterińizge sala keteıik, Parıj soty Frantsııanyń burynǵy prezıdenti Nıkolıa Sarkozıdi 2007 jylǵy saılaý naýqanyn Lıvııa qarjylandyrýy isi boıynsha qylmystyq qastandyq jasady dep tanyp, bes jylǵa bas bostandyǵynan aıyrdy.

Trıbýnal tóraǵasy Natalı Gavarıno burynǵy prezıdenttiń, sol kezde áli kandıdat bolǵan kezde, Lıvııa rejıminen «qarjylyq qoldaý alý úshin eń jaqyn seriktesterine áreket etýge ruqsat bergenin» túsindirdi. Sarkozıge passıvti sybaılas jemqorlyq, naýqandy zańsyz qarjylandyrý, memlekettik qarajatty jymqyrý jáne qylmystyq uıymǵa qatysý aıyptary taǵyldy.

21 qazanda Nıkolıa Sarkozı jazasyn óteý úshin Sante túrmesine aýystyryldy, onda ol kitap jazýǵa kiristi.