Sarkozı frantsýz salyǵynan qashyp, Londonǵa ketpek
ASTANA. 23 qańtar. QazAqparat - Fratsýz baspasóziniń málimetterinshe, Frantsııanyń burynǵy prezıdenti Nıkolıa Sarkozı Londonda ınvestıtsııalyq qor ashpaqshy.
Bul onyń artynsha Londonǵa kelip, sotsıaldar úkimeti ornatqan baı frantsýzdarǵa qoıylatyn 75 paıyzdyq salyqtan qutylýǵa jol ashatyn kórinedi. Alaıda eks-prezıdenttiń jaqtastary bul aqparattardy joqqa shyǵarýda, dep jazadyThe Telegraph.
Frantsýzdyq Mediapart basylymynyń eldiń qarjy jáne óndiris salasyndaǵy qupııa aqparat kózderine silteme jasaı otyryp jazýynsha, Sarkozı qazir qordy qurý boıynsha kelissózder júrgizip, bul iske 1 mlrd. eýro (1,3 mlrd. dollar) salýdy josparlap jatqan kórinedi.
Qor qurý týraly derekterdi burynǵy prezıdenttiń kompıýterin tekserý kezinde polıtsııa ókilderi tapqan-mys. Ol derekter Sarkozı saılaýaldy kompanııany zańsyz qarjylandyrdy degen aıyppen tárkilengen.
Al Sarkozıdiń jaqtastary onyń Ulybrıtanııaǵa ketpek oıyn da, onda qor qurmaq oıyn da joqqa shyǵaryp otyr. Qalaı desek te, eks-prezıdentke tekseris áreketterine baılanysty el aýmaǵynan shyǵýǵa tyıym salynǵan.
Esterińizge salaı keteıik, Sarkozı Frantsııany 2007-2012 jyldar aralyǵynda basqardy. Ótken jyldyń mamyr aıyndaǵy saılaýda sotsıalıster partııasynyń basshysy Frantsýa Ollandqa taǵyn túsip bergen. The Daily Mail basylymynyń jazýynsha, qyzmetinen ketken soń ol halyq aldynda sóz sóılep, paıda taýyp júrgen kórinedi. Ony mundaı sóz sóıleýge shaqyrǵandar saǵatyna 150 myń brıtan fýntyn (240 myń dollar) tóleıdi eken.
Úkimet basyna kelisimen Olland bastaǵan sotsıalshyldar tabysy 1 mln. eýrodan asatyn baı frantsýzdarǵa 75 paıyzdyq salyq engizgen bolatyn. bul áreket aýqatty azamattardyń shet elderge jappaı kóshýine ákelip soqty. Atap aıtar bolsaq, eń baı frantsýz Bernar Arno men ataqty akter Jerar Deparde Belgııaǵa ketpek bolǵan. Sońǵysy aqyry Reseıdiń azamattyǵyn alyp tyndy.
