Sarqylatyn kenishterden 2045 jylǵa deıin munaı alýǵa bolady
ASTANA. KAZINFORM — Qoǵam talqysyna shyǵarylǵan jańa Salyq kodeksiniń jobasynda sarqylyp bara jatqan munaı-gaz kenishterin ıgerip jatqan kompanııalardy jer qoınaýyn paıdalaný salyǵynan bosatý usynylyp otyr. Energetıka mınıstrligi Kazinform saýalyna joldaǵan jaýapta mundaı bastamanyń qaıdan paıda bolǵanyn túsindirdi.
«Búginde ıgerilip jatqan kómirsýtek ken oryndarynyń kópshiligi XX ǵasyrdyń basynda jáne ortasynda ashylǵan, ıgerýdiń sońǵy satylarynda (III–IV satylar) tur. Taıaý onjyldyqta mundaı ken oryndarynyń kóbiniń tolyq toqtaý yqtımaldyǵy bar. Óıtkeni olardyń odan ári jumys isteýi uzaqmerzimdi ınvestıtsııa salǵanda ǵana múmkin bolady. Osyǵan baılanysty Memleket basshysy 2021 jyly sheteldik ınvestorlar keńesinde Úkimetke eski munaı ken oryndaryn óndirýdi qoldaý jáne tıimdi paıdalaný baǵytynda sharalar ázirleýdi tapsyrdy. 2024 jylǵy aqpanda Jer qoınaýy jáne jer qoınaýyn paıdalaný týraly kodekske sarqylyp bara jatqan ken oryndarynyń ólshemderin jáne olardy yntalandyrý sharalaryn aıqyndaý jónindegi ózgerister qoldanysqa engizildi», — dep túsindirdi mınıstrlik.
Bul kompanııalar salyqtan bosatylǵanmen memleketten qosymsha mindettemeler alady.
Budan ári sarqylyp jatqan ken oryndaryna salyqtan únemdelgen qarajatty ózi ıgerip jatqan ken ornyn damytýǵa keri ınvestıtsııalaý shartymen, ıaǵnı kiris pen dıvıdend tólemeı-aq jer qoınaýyn paıdalanýǵa balamaly salyqty qoldaný nemese ony jergilikti bıýdjetterge aýdarý quqyǵyn berý usynylady.
«Qysqa merzimdi kezeńde balama salyq qoldanýǵa baılanysty salyq túsimderiniń tómendeýine qaramastan, óndirýdiń qosymsha kólemderi, ken ornyn ıgerý merziminiń ulǵaıýy jáne tıisti mýltıplıkatıvti áser bıýdjetke qosymsha túsimder ákeledi. Osylaısha sarqylatyn ken oryndaryn qoldaýdyń kórsetilgen tetigin engizý osyndaı ken oryndarynda óndirýdiń ómirlik tsıklin 10-25 jylǵa uzartýǵa, 2045 jylǵa qaraı shamamen 60 mln tonna munaı óndirýge, aǵymdaǵy jumys oryndaryn jáne qoldanystaǵy ınfraqurylymdy saqtaýǵa múmkindik beredi», — dep jazylǵan resmı jaýapta.
